Në Zululandin e sotëm ishin të ftuar Afrim Krasniqi dhe Dritan Hila, me të cilët Nano bëri një diskutim mbi situatën politike. Nano e nisi me një opinion: "Shqiptarët votuan në vitin 2013 me dy shpresa në kokë: 1. do largonin Berishën në shtëpi, dhe 2. Rama do bënte rilindjen e këtij vendi. Kanë gënjyer veten për të dyja: Rama është një dështim total, ndërsa për Berishën mund të thuhen të gjitha, por jo që ka ikur".
Hila nënvizoi se kish votuar për Ramën, por jo se nuk e kishte ditur që Rama do dështonte. Thjesht kishte dashur që Berisaha të ikte. Dështimin e Ramës ai e shihte në radhë të parë tek dështimi në planin ekonomik. "Ky është i vetmi kryeministër që nuk mban pranë vetes një këshilltar ekonomik", tha Krasniqi në këtë pikë.
Në pjesën e dytë u fol për opozitën, dhe Krasniqi ishte me idenë se PD-ja po bëhet gati të shkojë në zgjedhjet e vitit tjetër me njerëz të rinj, të cilët gjithsesi do jenë të zgjedhurit e Berishës. Me këtë la të kuptohet se, për të, PD-ja ka qenë e do mbetet e Berishës. "Njerëz me integritet si Eduard Selami do ta kenë të vështirë në atë parti", tha ai. Hila u shpreh kundër përpjekjeve për të na imponuar fytyra të reja që nuk thonë asgjë, dhe në këtë mes ai përmendi si model Salianjin.
Të tre opinionistët e konsideruan gjendjen e vendit dramatike e të pashpresë. Krasniqi shprehu besimin e tij se reformimi i sistemit të drejtësisë, sidomos me ndihmën e strukturave institucionale të projekt kushtetutës së re që do monitorohen nga të huajt, mund të ishte një shpresë për ndryshim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
