Gjykata e Shkallës së Parë në Vlorë ka caktuar masën e sigurisë “arrest në burg” për shtetasin Geraldo Biba, efektiv i policisë private, i ndaluar nga policia pas ngjarjes së ndodhur në zonën e Zvërnecit më 30 maj.
Seanca për vlerësimin e masës së sigurisë u zhvillua nën drejtimin e gjyqtarit Etien Isak, ndërsa organi i akuzës u përfaqësua nga prokurorja Julinda Gjika.
Gjatë seancës u paraqitën pretendimet e palëve dhe materialet hetimore të administruara deri në këtë fazë të procedimit. Prokuroria kërkoi caktimin e masës së sigurisë “arrest në burg”, duke argumentuar nevojën e vijimit të hetimeve dhe rëndësinë e rrethanave të çështjes.
Pas shqyrtimit të kërkesës dhe provave të paraqitura, gjykata vendosi të pranojë kërkesën e prokurorisë, duke lënë në fuqi masën e sigurisë “arrest në burg” ndaj Geraldo Bibës.
Vendimi është marrë në kuadër të hetimeve që po zhvillohen për zbardhjen e plotë të ngjarjes së ndodhur në Zvërnec. Organet ligjzbatuese vijojnë veprimet hetimore për dokumentimin e plotë të rrethanave dhe përcaktimin e përgjegjësive lidhur me këtë rast.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
