Kamioni përplaset në një kortezh mortor, 19 të vdekur dhe 20 të plagosur në Kinë

Përplasja e një kamioni me një kortezh mortor ka shkaktuar 19 të vdekur dhe 20 të plagosur në Kinë.

Hetimet për të zbuluar dinamikën e aksidentit të frikshëm rrugor që përfshiu mbrëmjen e së shtunës dhjetëra makina të një kortezhi mortor në provincën Jiangxi në Kinën lindore, janë ende në vijim.

Nga të dhënat paraprake raportohet se një kamion i cili lëvizte me shpejtësi u përplas me një kortezh mortor që priste të ndiqte një arkivol, përpara ceremonisë së djegies.

Dëshmitarët thonë se kamioni goditi një turmë me njerëz dhe disa makina, duke u ndalur vetëm pas makinës që mbarte kufomën.

Dyshohet se shkak i mundshëm i aksidentit mund të ketë qenë mjegulla e madhe e natës, ndërsa shoferët ishin paralajmëruar për shikueshmëri të dobët.