Sekretari i shtypit i Shtëpisë së Bardhë Sean Spicer, zëdhënës i presidentit Donald Trump gjatë gjashtë muajve të parë të presidencës së tij, dha dorëheqjen, sipas njoftimeve në mediat amerikane.
Vendimi i zotit Spicer, sipas mediave, duket të jetë i lidhur me emërimin e një drejtori të ri të komunikimit në Shtëpinë e Bardhë, financieri i Nju Jorkut Anthony Scaramucci. Zoti Spicer ka thënë se do të ndihmojë për të lehtësuar kalimin e detyrës te zëdhënësi i ri.
Zëdhënësi i ri i pritshëm Scaramucci mendohet se mund të luajë një rol të ndjeshëm si një nga mbrojtësit e zotit Trump përpara audiencave televizive.
Zoti Spicer pati një fillim të pazakontë si zëdhënës i Shtëpisë së Bardhë. Që ditën e parë në detyrë, ai kritikoi ashpër gazetarët për vlerësimin që ata i bënë numrit të njerëzve që morën pjesë në inaugurimin e presidentit. Ai doli nga salla pa iu përgjigjur pyetjeve.
Mënyra e tij e interpretimit të informacioneve dhe shkëmbimet e tensionuara me median e bënë zotin Spicer objekt satire në programin mjaft të ndjekur humoristik Saturday Night Live, ku roli i tij luhej nga aktorja Melissa McCarthy.
VOA
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
