Sulmi terrorist në Manchester, xhihadisti kishte një bombë për të shkaktuar shumë viktima

Detaje të reja janë zbuluar nga policia britanike rreth masakrës së xhihadistit 23-vjeçar në Manchester Arena.

Sipas policisë personi që kreu shpërthimin në koncert, ishte nisur për të vrarë sa më shumë spektatorë që të ishte e mundur.

Pajisja shpërthyese ishte një bombë e ndërtuar me gozhdë, ciflat e të cilave u përhapën në një rreze të gjerë.

Eksperti britanik i sigurisë, Will Geddes, u tha gazetarëve se pajisja shpërthyese duket të ishte e tillë që të shkaktonte sa më shumë viktima.

“Kur shpërthen një bombë, tha ai, dëmi më i madh shkaktohet nga ciflat që përhapen dhe kjo është arsyeja se pse terroristët përdorin shpesh çanta të mbushura me kuzhineta”.

Dëshmitarët thanë se vendi pranë shpërthimit ishte e mbushur me bulona të dimensioneve të ndryshme dhe ekipet e ndihmës mjeksore konfirmuan se plagët më të shumta ishin shkaktuar nga ciflat metalike.

Kritikët u bënë jehonë pohimeve të disa fansave se masat e sigurisë në koncert ishin të dobëta.

Sipas tyre, rojet në hyrje të koncertit ishin më të preokupuar se mos fansat kishin me vete pije alkoolike në vend të ujit.