Fytyrë ovale, pa mjekër, flokë të shkurtër kaçurrela, sy të mëdhenj dhe hundë të gjatë. Ky ka qenë portreti i Jezu Krishtit, në momentin e pagëzimit. Imazhi i Krishtit mund të jetë pikturuar pesë shekuj pas vdekjes së tij dhe është gjetur gjatë gërmimeve arkeologjike në Shivta, në shkretëtirën Negev, në Izraelin jugor.
I publikuar në revistën “Antiquity”, ky zbulim është kryer nga një grup studiuesish të universitetit izraelit të Haifës. Ajo që e bën unik portretin e zbuluar është fakti se ai e paraqet Krishtin në një mënyrë krejt tjetër nga ajo tradicionale: me karakteristika perëndimore, me mjekër dhe me flokë të gjatë.
E zbuluar fillimisht në vitet ’20, kjo pikturë nuk kishte tërhequr shumë vëmendje për shkak të gjendjes së keqe në të cilën ishte. Interpretimi i saj është bërë krejt rastësisht. "Rastisa aty në kohën e duhur dhe në vendin e duhur, me këndin e duhur të dritës dhe, papritmas, pashë sytë", thotë Emma Maayan-Fanar, e cila ka drejtuar studimin.
"Duke e parë me kujdes kuptova se bëhej fjalë për fytyrën e Jezusit, e portretizuar gjatë pagëzimit të tij". Në të majtë të tij është e dukshme një tjetër fytyrë, e cila mund të jetë ajo e Gjon Pagëzorit. Sfondi i pikturës sugjeron se aty është paraqitur momenti i pagëzimit të Krishtit. Piktura mendohet se i përket shekullit VI pas Krishtit.
Studiuesit thonë se zbulimi në fjalë është i rëndësishëm, “pasi i përket skemës ikonografike të një Krishti të shkurtër me flokë, e cila ka qenë e përhapur në Egjipt, Siri dhe Palestinë, por u zhduk nga arti bizantin që pasoi më vonë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
