Dëshmitarët e Jehovait: Anëtarët e familjes Josifi nuk janë pjesëtarë të Organizatës tonë

Dëshmitarët e Jehovait në Shqipëri kanë reaguar në lidhje me ngjarjen tragjike të ditës së djeshme në kryeqytet, duke u shprehur se pjesëtarët e familjes Josifi që u gjetën të pajetë në një banesë në Kombinat nuk janë anëtarë të kësaj Organizate.

Përmes një deklarate për mediat, Dëshmitarët e Jehovait bëjnë me dije se pjesëtarët e familjes Josifi jo vetëm që nuk kanë qenë pjesëtarë të Organizatës së tyre, por as nuk janë shoqëruar ndonjëherë me Dëshmitarët e Jehovait.

Në deklaratën e tyre, theksohet se përpjekjet për të lidhur këtë ngjarje, apo çdo element tjetër të saj me besimin e Dëshmitarëve të Jehovait është krejtësisht e pabazë dhe madje fyese.

“Dëshmitarët e Jehovait kanë pikëpamjen e Zotit për jetën dhe e çmojnë atë si gjënë më të shtrenjtë. Vetëvrasja me pretendimin për të shkuar në një jetë më të mirë, nuk përputhet në asnjë mënyrë me besimin e Dëshmitarëve të Jehovait”, citohet nga deklarata.  

Ndër të tjera, në deklaratën e tyre për mediat, ata i bëjnë thirrje kësaj të fundit për të korrigjuar informacionet e pasakta që lidhin Organizatën e tyre me këtë tragjedi të rëndë.

“Informacione të tilla të gabuara dhe paragjykuese nuk bëjnë gjë tjetër veçse mbjellin urrejtje tek njerëzit  për anëtarët e një organizate që njihet gjerësisht në Shqipëri dhe në botë, për qëndrimin e tyre shembullor, për vlerësimin që kanë për jetën, të bindur ndaj qeverive dhe paqedashës”, thuhet në deklaratë.

Ngjarja e rëndë u shënua dje pasdite në Tiranë. Nëna dhe vajza e saj 30 vjeçe u gjeten të vdekura në banesë, ndërsa vajza tjetër 34 vjeçe u dërgua në gjendje të rëndë në spital.

Ka qenë vëllai i 56 vjeçares, shtetasi S.F i cili dje (2 korrik 2020) më datë 02.07.2020, ka njoftuar në Komisariatin e Policisë nr 6 se  në rrugën "Hamdi Cenoimeri" se motra e tij nuk i përgjigjej në telefon dhe nuk i hapte derën e banesës.

“Në banesë  kanë shkuar shërbimet e Policisë dhe të zjarrfikëses dhe pasi kanê hapur derën, kanë gjetur pa shenja jete shtetasen Zhaneta Josifi., 56 vjeçe dhe vajzën e saj Anisa Josifi, 30 vjeçe, ndërsa vajza tjetër Blerta Josifi rreth 34 vjeçe, është dërguar në spital, në gjendje të rëndë shendetësore. Paraprakisht nga veprimet e para hetimore dyshohet se janë vetëflijuar” – njoftoi policia.

Ka qenë drejtori i Policisë së Tiranës, Rebani Jaupaj ai që dha detaje nga ngjarja e rëndë që tronditi dje Tiranën.

Gruaja dhe dy vajzat e saj kishin tre ditë që nuk kishin komunikuar dhe kjo kishte nxitur vëllanë e 56-vjeçares të kërkonte ndihmën e policisë.

Jaupaj tregoi se kishte hyrë nga dritarja e banjos.

Rebani Jaupaj: “Vëllai ka telefonuar dhe ka thënë nuk kam kontakt prej tre ditësh me motrën dhe nuk përgjigjen në telefon. U ngrit grupi hetimor, shkuan në banesë dhe në pamundësi për të hapur derën e banesës, hymë nga dritarja e banjos. Konstatuam të ëmën të vdekur. Një nga vazjat në gjëndje kritike për jetën dhe në një ambient tjetër në krevat është gjetur e mbuluar me batanije dhe mbi batanije një jorgan vajza tjetër pa shenja jete. U ngrit grupi hetimor dhe po kryen veprime. Mendohet se mund të jenë vetëflijuar.

Ai tha se te viktimat nuk kishin pasur shenja dhune, por është konstatuar se ditët e fundit nuk janë ushqyer.

Rebani Jaupi: ''Paraprakisht eksperti mjeko-ligjor komunikoi dhe të dy viktimat nuk kishin shenja jete por mendohet se mund të jenë vetëflijuar, grupi hetimor vazhdon hetimet. Po grumbullojmë të gjitha provat materiale në ambientet e banesës. Kemi gjetur shënime të ndryshme me përmbajtje fetare. Të dyja vajzat kanë qenë të arsimuara, kanë mbaruar shkollën e lartë por ishin të papuna. Në konstruktin e tyre shihet që ka shenja të mosushqyerjes ditët e fundit. Do të japim një deklarim më të saktë pasi të dalë ekspertiza mjeko-ligjore.''

Grupi hetimor i përbërë dhe nga dy ekspertë të mjekësisë ligjore mbërriti në vendngjarje dhe aktualisht po punohet për zbardhjen e plotë të rrethanave të ngjarjes.