Rusia: Furnizimi i Ukrainës nga SHBA me municione të uraniumit "akt kriminal"

Zëvendësministri i Jashtëm i Rusisë akuzoi të enjten Shtetet e Bashkuara për kryerjen e "një akti kriminal" pas premtimit të Uashingtonit për të furnizuar Ukrainën me municion të uraniumit të varfëruar për herë të parë, njoftoi media shtetërore ruse.

Municioni është pjesë e mbështetjes së re prej 1 miliard dollarësh për Ukrainën, e njoftuar të mërkurën.

Municionet, të cilat mund të shkarkohen nga tanket Abrams të prodhuar në SHBA që pritet të mbërrijnë në Ukrainë këtë vjeshtë, janë pak radioaktive sepse janë bërë nga metali i dendur, një nënprodukt nga prodhimi i karburantit për termocentralet bërthamore.

Duke folur pas një seminari mbi mospërhapjen bërthamore të enjten, zëvendësministri i Jashtëm rus Sergei Ryabkov pretendoi se masa e SHBA ishte "një reflektim i shpërfilljes së egër të Uashingtonit për pasojat mjedisore të përdorimit të këtij lloj municioni në një zonë lufte", njoftoi agjencia RIA Novosti.

“Është e qartë se atyre nuk u intereson kush do të marrë frymë, ku do të vendoset, si dhe çfarë pasojash do të sjellë për ata që po luftojnë tani dhe çfarë do të ndodhë me brezat që do të jetojnë në këtë tokë" pohoi Ryabkov.

Sipas Agjencisë Ndërkombëtare të Energjisë Atomike, uraniumi i varfëruar përdoret në municionet e krijuara për të shpuar veshjet e blinduara, sepse ato bëhen më të mprehta gjatë goditjes me një objektiv. Sipas vëzhguesit bërthamor të OKB-së, ai është "dukshëm më pak radioaktiv se uraniumi natyror".

Në mars, Ministria e Mbrojtjes e Mbretërisë së Bashkuar akuzoi Rusinë për përhapjen e dezinformatave pasi Presidenti Vladimir Putin paralajmëroi Londrën kundër ofrimit të Ukrainës me municion që përmban uranium të varfëruar.

“Është një komponent standard dhe nuk ka të bëjë me armët apo aftësitë bërthamore. Rusia e di këtë, por qëllimisht po përpiqet të dezinformojë”, tha në atë kohë një zëdhënës i ministrisë britanike të mbrojtjes.