Prokuroria e Durrësit ka nisur hetimet lidhur me pasojat e tërmetit të 26 nëntorit. Sipas njëoftimit të akuzës, hetimet kanë nisur më 29 nëntor, mbi dyshimin se pasojat e tërmetit kanë ardhur si shkak i ndërtimeve pa leje dhe të moskryerjes së detyrës nga inxhinierët zbatues dhe personat përgjegjës si dhe nga mospërmbushja e rregullt e detyrës nga nëpunësit shtetërorë të ngarkuar me mbikëqyrjen e këtyre ndërtimeve. Çështja në fjalë në Prokurorinë e Durrësit është regjistruar për veprat penale: "Ndërtim pa leje" dhe "Shpërdorim detyre".
Ndërkohë, paralelisht hetimet kanë nisur edhe nga Prokuroria e Rrethit Gjyqësor Tiranë. Hetimi ka si objekt kryerjen e veprimeve të shpejta në drejtim të sqarimit të rrethanave konkrete, që kanë çuar në pasojat e ardhura dhe gjendjen e ndërtimeve.
Veprat penale që po hetohen janë ato të shpërdorimitë të detyrës, parashikuar nga neni 248 i Kodit Penal, ku do hetohet për organet që kanë miratuar lejet e ndërtimit dhe nëse ato janë dhënë në mbështetje të ligjit, si dhe nëse ndërtuesit kanë respektuar lejen e marrë, ndërtim i paligjshëm, dhe dhënia e ndihmës për ndërtim të paligjshëm.
Durrësi ishte njëra prej dy zonave më të dëmtuara nga tërmeti i së martës së kaluar. Për shkak të lëkundjes me magnitudë 6.4, në Durrës u shembën një numër i madh ndërtesash që kanë shkaktuar vdekjen e 22 personave. Ndërkohë, dhjetëra banesa dhe pallate të tjera u bënë të pabanueshme dhe janë në proces shembjeje.
Ndërsa në Tiranë u regjistrua një viktimë dhe dëme të shumta materiale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
