Çuçi takohet me homologun austriak: Do të krijojmë Policinë Alpine

Ministri i Brendshëm, Bledi Çuçi ka bërë me dije se së shpejti një departament i ri do të jetë pjesë e Policisë së Shtetit.

Përmes një postimi në Facebook, Çuçi shkruan se është takuar këtë të mërkurë me ministrin e Punëve të Brendshme të Austrisë, Karl Nehmmer, me të cilin ka folur mbi asistencën që mund t’i japin për krijimin e një skuadre të “Policisë Alpine”.

“Me ministrin Federal të Punëve të Brendshme të Austrisë, Karl Nehammer, gjatë takimit të sotëm në Tiranë folëm edhe për asistencën që ata mund të na japin për të krijuar skuadrën e Policisë Alpine në Policinë e Shtetit.

Gjithmonë e më shumë zonat malore të Shqipërisë po preferohen nga turistët, përfshi edhe ata nga Austria. Alpet tona janë një destinacion mjaft i frekuentuar nga turistët gjatë gjithë vitit.

Besoj se ka ardhur momenti që këtij realitet të ri të krijuar në këto zona t’i qasemi në një formë tjetër edhe përmes shërbimit policor.”, shkruan Çuçi.