Një rrjet i madh kriminal i përfshirë në mashtrim dhe pastrim parash është zbuluar falë një hetimi ndërkombëtar. Në hetimin e mbështetur nga Europol dhe Eurojust u përfshinë autoritetet e zbatimit të ligjit dhe gjyqësori i Austrisë, Bullgaria, Gjermania dhe Serbia.
Aksioni u zhvillua në Beograd dhe Sofje më 2 prill, pavarësisht izolimit për shkak të pandemisë. Autoritetet e zbatimit të ligjit në të dy vendet kryen 11 kontrolle të shtëpive dhe arrestuan 9 persona (5 në Serbi dhe 4 në Bullgari). Dy nga drejtuesit e rrjetit kriminal u arrestuan në Sofje, bën të ditur Europol.
Në kuadër të operacionit janë sekuestruar pesë prona në Serbi, 2.5 milionë € nga një llogari bankare në Gjermani, pajisje elektronike dhe materiale të tjera në cilësinë e provës. Për më tepër, 30 llogari të tjera bankare u vunë nën mbikëqyrje.
Grupi në fjalë është një rrjet i madh kriminal, që përfshinte qytetarët nëpërmjet mashtrimit në investime false. Njerëz nga e gjithë bota kanë rënë viktimë e kësaj skeme që niste me investime rreth 250 €. Agjentët nga call centerat në Bullgari dhe Serbi manipulonin qytetarë të thjeshtë, duke i bindur të investonin në produkte inekzistente.
Zyra Austriake e Policisë Kriminale (Bundeskriminalamt) vlerësoi se vlera e mashtrimit në rajon arrin në 80 milion €. Vetëm në Austri, vlerësohet se 850 persona humbën rreth 2.2 milion € në këtë skemë. Qindra të tjerë në Gjermani kanë humbur rreth 10 milion €.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
