Presidenti i SHBA-ve, Donald Trump, ka paditur dy banka në përpjekje për të ndaluar dorëzimin e të dhënave të tij financiare në Kongres.
Padia kundër Deutsche Bank dhe Capital One është ngritur pasi komisionet e drejtuara nga demokratët kërkuan informacion në lidhje me financat e tij.
Tre fëmijët e tij më të mëdhenj dhe Organizata Trump iu bashkuan padisë, sipas të cilës kërkesa për hetimin e çështjeve që kanë të bëjnë me bizneset e familjes nuk ka baza ligjore.
Demokratët thonë se pavarësisht kësaj, ata do ta vijojnë punën e tyre.
Një zëdhënëse e Deutsche Bank tha për "New York Times": "Ne mbetemi të angazhuar për të siguruar informacionin e duhur për të gjitha hetimet e autorizuara".
Padia e paraqitur të hënën në Nju-Jork synon të bllokojë bankat, në mënyrë që ato të mos përmbushin kërkesën e Kongresit të kontrolluar nga demokratët, i cili po heton marrëdhëniet financiare të familjes Trump.
Të dyja bankat janë të përfshira në projektet e pasurive të patundshme të presidentit Trump.
Gjatë muajit prill, komisionet e Inteligjencës dhe Shërbimeve Financiare në Dhomën e Përfaqësuesve i kërkuan informacion bankës gjermane Deutsche Bank, e cila është një nga huadhënësit më të mëdhenj të Organizatës Trump dhe disa institucioneve të tjera financiare.
Komisionet kërkojnë dokumente dhe materiale që lidhen me marrëdhënien e gjatë të bankës me z. Trump dhe familjen e tij.
Në vitin 2017, banka refuzoi kërkesat e demokratëve në Dhomën e Përfaqësuesve për të dhënë detaje mbi financat e presidentit, duke e argumentuar këtë me ligjet e privatësisë.
Atë vit u raportua gjithashtu se avokati i posaçëm Robert Mueller, i cili udhëhoqi hetimin për bashkëpunim të dyshuar midis fushatës presidenciale Trump dhe Rusisë, kishte urdhëruar Deutsche Bank t’i siguronte të dhëna mbi llogaritë e z. Trump.
Përfaqësuesi Adam Schiff, kryetari demokrat i Komitetit të Inteligjencës të Shtëpisë, tha se thirrjet ishin pjesë e një hetimi "në pretendimet për ndikim të huaj të mundshëm në procesin politik të SHBA".
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
