Ministrja e Jashtme kroate, Marija Pejčinović Burić, është zgjedhur dje në postin e sekretares së Përgjithshme të Këshillit të Evropës. Ajo ka marrë 159 vota nga anëtarët e asamblesë parlamentare, ndërsa rivali i saj, ministri i Jashtëm belg, Didier Reynders, mori vetëm 105 vota.
Zgjedhja e saj në krye të Këshillit të Europës vjen pas vendimit të shumëdebatuar të Asamblesë Parlamentare (PACE) - me shumicë votash - për të lejuar rikthimin e përfaqësuesve rusë, pesë vjet pasi Moskës iu hoq e drejta e votës për shkak të aneksimit të Krimesë. Rusia kërcënoi se do të largohej nga PACE nëse i ndalohej të votonte në zgjedhjen e norvegjezit Thorbjørn Jagland, i cili ka mbajtur deri tani postin e sekretarit të Përgjithshëm të Këshillit të Europës.
Po dje, Këshilli i Europës njoftoi se do të anulonte dërgimin në Shqipëri të vëzhguesve të zgjedhjeve vendore.
Këshilli i Europës është një organizatë ndërkombëtare që ka synim ruajtjen e të drejtave të njeriut, demokracisë dhe sundimit të ligjit në Europë. Shqipëria është anëtare me të drejta të plota që prej vitit 1995. E themeluar në vitin 1949, Këshilli ka 47 vende anëtare dhe vepron me një buxhet vjetor rreth 500 milionë euro.
Organizata dallon nga Këshilli Europian, i cili përbëhet nga krerët e 28 shteteve anëtare të BE-së dhe që merret me drejtimin e përgjithshëm politik të Bashkimit Europian.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
