Goditet 'Ndragheta', 6 shqiptarë në pranga/ Trafikuan 27 milionë euro kokainë në 2 vite (VIDEO)

Një operacion i gjerë antidrogë është zhvilluar nga Guardia Di Finanza, ku është goditur një rrjet i trafikimit të kokainës italo-shqiptar.

Në pranga u vunë 28 persona, 25 prej të cilëve u lanë në burg, ndërsa 3 të tjerë në arrest shtëpie. Shqiptarët e përfshirë janë Marjus Aliu, Elvis Aliu, Fation Aliu, Ervin Bashmeta, Kujtim Daiu dhe Artur Hoxhosmani. 

Gazetari Besmir Pula në një lidhje me studion e MCN LIVE tha se shqiptarët kanë pasur rolin e ndërmjetësuesit.

Shqiptarët kanë pasur rolin e ndërmjetësuesit. Duhen parë nëse kanë qenë më shumë se ndërmjetësues. Nuk flitet për shqiptarë që janë drejtues, por për persona që marrin kokainën nga vendet e Amerikës Latine. Nuk është se kemi të dhëna, nëse kanë investuar para në Shqipëri. 

Të arrestuarit i përkasin një organizate kriminale të lidhur me Ndrangheta-n e Lokridës, e cila, me mbështetjen e kriminelëve shqiptarë, promovoi, organizoi dhe financoi trafikun ndërkombëtar të drogës. Midis tyre është një shtetas kinez , i akuzuar për pastrim parash, i cili lehtësoi pagesat e drogës përmes sistemit informal të transferimit "fei ch'ien".

Hetimet, të bazuara në analizën e komunikimeve në SkyEcc, kanë zbuluar një trafik kokaine me vlerë mbi 27 milionë euro, të importuar nga Amerika e Jugut dhe të destinuar për tregun në Lombardi.