Eksperti i ekonomisë në Partinë Demokratike, Dorjan Teliti, shkruan në rrjetin social “Facebook” se të gjitha studimet brenda dhe jashtë vendit e nxjerrin qeverinë zbuluar në raport me mbështetjen që ajo u ka dhënë shqiptarëve gjatë kohës së pandemisë.
Teliti deklaron se sipas një studimi të studentëve të diplomuar të Fakultetit Ekonomik, 91.5% e të anketuarve shprehen se Covid-19 ka ndikuar negativisht në gjendjen financiare të bizneseve dhe familjeve shqiptare.
93.3% e të anketuarve nuk kanë marrë asnjë ndihmë nga qeveria.
“Të gjitha raportet apo studimet në vend apo edhe jashtë Shqipërisë e nxjerrin zbuluar qeverinë në raport me mbështetjen ndaj shqiptarëve për COVID 19. I tillë është edhe studimi i detajuar i disa studentëve dhe të diplomuarve të Fakultetit të Ekonomisë, studentë energjikë, inteligjentë, të përgatitur dhe mjaft elokuentë, anëtarë të UKS, me të cilët pata kënaqësinë të komunikoja.
Rezultatet e studimit ishim shumë interesante dhe nxirrnin në pah realitetin e hidhur që të gjithë ne e shohim dhe e ndjejmë përditë, ku ndër më kryesoret mund të veçojmë:
91.5% e të anketuarve shprehen se Covid-19 ka ndikuar negativisht në gjendjen financiare të bizneseve dhe familjeve shqiptare.
93.3% e të anketuarve nuk kanë marrë asnjë ndihmë nga qeveria, ndonëse ndihma sado e vogël ishte jetike për pjesën dërrmuese të tyre.
Pesimizmi i te anketuarve nuk është vetëm për ditët që po jetojmë, por shtrihej edhe më tej, pasi 80% e tyre mendojnë se ekonomia shqiptare do të jetë akoma edhe më keq pas 12 muajsh.
Qartësisht situata është alarmante, çdo ditë që kalon thjesht e thellon akoma më shumë krizën e shtrirë kudo anembanë vendit.
Duhet vizion, strategji, duhen paketa mbështetëse në ndihmë të ekonomisë, konsumit dhe biznesit, përndryshe përmasat e recesionit do të jenë katastrofike.
Mjaft me propagandë, llafet nuk pijnë as ujë e nuk mbushin as barkun me bukë, nuk gjenerojnë as vende pune e nuk e rrisin prodhimin. Nevojiten ndërhyrje inteligjente dhe te qenësishme për t’i bërë ballë sfidës së madhe që po përjetojmë.
Mjaft të qenurit të fundit në rajon për paketat mbështetëse e të parët për taksa e burokraci, kjo filozofi qeverisëse duhet të marrë fund sa më shpejt”, është shprehur demokrati Dorjan Teliti.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
