Deri në vitin 2100 akullnajat do të humbasin 20-52% të masës së tyre

Një pjesë e madhe e akullnajave mund të zhduken deri në vitin 2100 për shkak të ndryshimeve klimatike.

Është folur prej disa kohësh, por tashmë të dhënat shkencore vijnë në një studim të botuar në revistën Science, i udhëhequr nga Universiteti amerikan Carnegie Mellon dhe i kryer në akullnajat në të gjithë globin (duke përjashtuar ato të Grenlandës dhe Antarktidës).

Akullnajat më të vogla se 1 kilometër katror në Evropën Qendrore, Kanadanë perëndimore dhe Shtetet e Bashkuara do të preken veçanërisht. Ekipi, i udhëhequr nga David Rounce, kreu një seri simulimesh, duke vlerësuar fatin e më shumë se 215,000 akullnajave në mbarë planetin.  

Sipas studimit, edhe në skenarin më të mirë, në të cilin rritja e temperaturës nuk kalon 1.5 gradë, gjysma e akullnajave do të humbasin përsëri.

Shkalla e shkrirjes së akullnajave ka vazhduar të rritet në dekadat e fundit dhe këto procese do të ndikojnë thellësisht, ndër të tjera, në ngritjen e nivelit të detit dhe disponueshmërinë e ujit të freskët për miliarda njerëz.

Prandaj, aftësia për të parashikuar humbjen e masës së akullnajave sa më saktë që të jetë e mundur është thelbësore për të kuptuar se si do të ndryshojë mjedisi dhe për të udhëhequr përpjekjet e ardhshme globale për përshtatjen dhe zbutjen e klimës . 

Për të përmirësuar parashikimet ekzistuese, zakonisht të kufizuara në zona të ngushta gjeografike, studiuesit shfrytëzuan një sasi të paparë të dhënash që mbulonin të gjitha akullnajat e botës, duke i përpunuar ato falë superkompjuterëve.

Shkalla e shkrirjes së akullnajave, theksojnë ekspertët, janë rritur ndjeshëm në dekadat e fundit dhe në vitet në vijim do të shohim një sërë pasojash që lidhen me këtë problem. 

Rezultatet sugjerojnë se akullnajat do të humbasin 20 deri në 52 për qind të masës së tyre totale deri në vitin 2100 . Prandaj, edhe në skenarët më të mirë, do të ketë një deglaciacion të madh që përfshin të gjitha akullnajat në planet.