Nga i nxehti ekstrem tek reshjet masive, Azia ‘përkulet’ nga kriza klimatike

Kontinenti më i madh dhe më i populluar në botë po përballet me efektet vdekjeprurëse të motit ekstrem të verës, pasi vendet durojnë valët e nxehtësisë dhe reshjet rekord të musonit, me qeveritë që paralajmërojnë banorët të përgatiten për më shumë që do të vijnë. Këtë muaj shirat e rrëmbyeshëm përmbytën pjesë të Japonisë, Kinës, Koresë së Jugut dhe Indisë, duke përmbysur jetën e miliona njerëzve dhe duke shkaktuar përmbytje, rrëshqitje dheu dhe ndërprerje të energjisë elektrike. Temperaturat rekord çuan gjithashtu në një rritje të sëmundjeve të lidhura me nxehtësinë, veçanërisht në mesin e komuniteteve vulnerabël siç janë të moshuarit. Të shtunën, të paktën 13 persona në qytetin qendror të Koresë së Jugut, Cheongju, vdiqën pasi ujërat nga brigjet e lumit përmbytën një nënkalim, duke bllokuar automjete, duke përfshirë një autobus publik. Të paktën 41 persona kanë vdekur në Korenë e Jugut ditët e fundit dhe mijëra të tjerë janë detyruar të evakuojnë shtëpitë e tyre dhe të kërkojnë strehim të përkohshëm, pasi rrebesh të mëdha kanë goditur pjesët qendrore dhe jugore të vendit. Në përgjigje të humbjes së jetëve, presidenti i Koresë së Jugut, Yoon Suk Yeol, bëri thirrje për një rishikim të qasjes së vendit ndaj motit ekstrem. Në Japoninë fqinje, reshjet rekord në jugperëndim të vendit rezultuan në përmbytje shkatërruese që lanë të paktën gjashtë persona të vdekur dhe shumë të tjerë ende të zhdukur. Kryeqyteti Delhi më 10 korrik shënoi ditën e tij më të lagësht të korrikut në më shumë se 40 vjet, sipas autoriteteve. Reshjet e dendura detyruan mbylljen e shkollave dhe lanë shumë të pambrojtur pa strehë. Ndërsa disa rajone po përballen me rrebeshe vdekjeprurëse, të tjera po përballen me nxehtësi të madhe. Të hënën, një stacion meteorologjik në Kinën verilindore regjistroi një temperaturë të lartë rekord prej 52.2 gradë Celsius (125 Fahrenheit), ndërsa Japonia pa temperaturat të rriten në 39.7 gradë Celsius (103 Fahrenheit). Në total, më shumë se pesë stacione meteorologjike në Kinë tejkaluan temperaturat maksimale prej 50 gradë Celsius (122 Fahrenheit) të hënën ndër më të nxehtat në histori. Kjo pason një verë të nxehtë rekord në kryeqytetin Pekin, e cila pa temperaturat në fillim të korrikut duke kaluar 40 gradë Celsius (104 Fahrenheit) duke i shtyrë zyrtarët të lëshojnë alarme të kuqe të nxehtësisë për dy javë ndërsa kriza globale klimatike intensifikohet.