Një 24-vjeçar është arrestuar në flagrancë nga Policia e Durrësit, pasi dyshohet se ka përdorur kartëmonedha euro të falsifikuara për të kryer pagesa.
I riu M. Rr., 24 vjeç, dyshohet se ka furnizuar automjetin me karburant në një pikë karburanti në fshatin Sinaballaj, Rrogozhinë, dhe ka kryer pagesën me 3 kartëmonedha 20 euro, të dyshuara të falsifikuara.
Pas kallëzimit të bërë nga subjekti, shërbimet policore organizuan veprimet hetimore, duke bërë të mundur identifikimin, lokalizimin dhe arrestimin e të dyshuarit.
Gjatë kontrollit fizik, në portofolin e 24-vjeçarit u gjetën edhe 10 kartëmonedha të tjera me prerje 20 euro, të dyshuara të falsifikuara. Në total, policia sekuestroi 13 kartëmonedha me prerje 20 euro, në cilësinë e provës materiale.
Vijojnë hetimet nën drejtimin e Prokurorisë për dokumentimin e plotë të veprimtarisë së dyshuar kriminale dhe për identifikimin e personave të tjerë që mund të jenë të përfshirë.
Materialet procedurale i janë referuar Prokurorisë për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
