Autoritetet federale të Shteteve të Bashkuara janë duke hetuar nëse Deutsche Bank ka vepruar në përputhje me ligjet që synojnë të pengojnë pastrimin e parave dhe shkelje të tjera, sipas një raporti të publikuar sot nga "New York Times".
Hetimi është në vazhdimësi të një raporti që gazeta publikoi muajin e kaluar, sipas të cilit punonjësit e bankës gjermane në filialin e saj në SHBA kishin përgatitur transaksione financiare të dyshimta për eprorët e tyre, këta të fundit vendosën të mos ua referojnë autoriteteve qeveritare.
Por transaksionet ishin të dukshme për shkak se lidheshin me kompanitë e drejtuara nga presidenti amerikan Donald Trump dhe dhëndri i tij, njëkohësisht këshilltari i lartë, Jared Kushner, sipas "Times".
Trump e hodhi poshtë raportin muajin e kaluar me argumentin se nuk kishte nevojë për bankat pasi ai vetë kishte shumë para kesh dhe mohoi se paratë vinin nga Rusia.
Ndërsa Kushner i cilësoi krejtësisht të rreme akuzat në lidhje me pastrimin e parave dhe "Deutsche bank". Nga ana tjetër, "Deutsche Bank" vijon të përballet edhe me betejën për rimëkëmbjen e saj pas krizës financiare të vitit 2008, ndërsa është rrënuar si pasojë e gjobave prej miliarda dollarësh dhe mungesa e menaxhimit.
Huadhënësi më i madh i Gjermanisë kohët e fundit është kthyer në qendër të vëmendjes për mungesën e masave që synojnë pastrimin e parave.
Ndërkohë, zëdhënësi i "Deutsche Bank" nuk pranoi të komentonte publikimin e "Times", por tha se mbeten të angazhuar për të punuar.
Aksionet e bankës më të madhe gjermane shënuan një rënie prej 0.6% pas publikimit të "New York Times" e cila citon 7 persona që kanë njohuri për çështjen.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
