Ambiciet për në Elysée të ministrit francez të Ekonomisë, Bruno Le Maire, kanë qenë prej kohësh një sekret publik në qarqet politike të Parisit, por grindjet e tij të fundit me presidentin francez kanë ngritur spekulime se ministri popullor po përpiqet të lërë në hije Emmanuel Macron.
Javët e fundit, ministri i Ekonomisë ka tërhequr gjithnjë e më shumë vëmendjen për qëndrimin vetjak dhe injorimin e udhëzimeve nga zyra e kryeministres Elisabeth Borne për të bërë deklarata publike.
Gjithçka nisi me një përplasje për furrtarët.
Macron kritikoi përpjekjet e Ministrisë së Ekonomisë për të ndihmuar furrtarët që përballen me faturat e larta të energjisë, në atë që u lexua si një qortim drejtuar Le Maire. Gjatë një konference për shtyp, Macron kritikoi një linjë ndihmëse qeveritare të krijuar nga ministria e Le Maire.
“E provova numrin për linjën e ndihmës që më dhanë, dhe gjejeni çfarë? Nuk funksionon. Jam ngopur me linjat e ndihmës në të gjithë vendin", i tha ai një grupi bukëpjekësish të mbledhur në pallatin Elysée.
Presidenti francez duket se është acaruar që Le Maire nxitoi përpara tij dhe njoftoi disa masa për të mbështetur furrtarët, ndihmë që Macron po planifikonte ta shpallte vetë, thanë disa këshilltarë të Pallatit Elysée për Playbook Paris. Duke folur në televizionin francez, Le Maire nuk e mohoi se ai mund të kishte qenë objektivi i komenteve të Macron.
Raportet se Macron humbet durimin e tij gjatë mbledhjeve të kabinetit janë të njohura në politikën franceze, por rrallëherë ka mosmarrëveshje të shfaqura në publik.
“Në politikë ju duhet të lini mënjanë egon, ndjeshmërinë tuaj”, tha Macron për BFMTV pas grindjes.
Sherri mes presidentit dhe ministrit të tij bëri xhiron e qarqeve politike. Aurore Bergé, kreu parlamentar i partisë së Macron, e përmblodhi qëndrimin e Le Maire ndaj Macron për këtë çështje në mënyrë më të vrazhdë: "Në thelb ai po thotë 'Unë jam Bruno Le Maire dhe mund të ta fus".
Kjo nuk është hera e parë që Le Maire ka shkaktuar reagim te Macron dhe besnikët e tij, të cilët vënë në dukje se ministri i ekonomisë shpesh injoron zyrën e kryeministrit dhe kultivon në mënyrë aktive rrjetet e tij të ligjvënësve dhe politikanëve.
“Presidentit nuk i pëlqen kur dikush nuk është lojtar skuadre dhe përpiqet të rrëmbejë vëmendjen, kështu që ai e vendosi [Le Maire] në vendin e tij. Kemi vetëm katër apo pesë vjet për të provuar veten dhe disa tashmë po mendojnë për atë që do të vijë më pas”, tha një këshilltar i qeverisë duke komentuar tensionet e fundit brenda qeverisë.
“Bruno Le Maire nuk e ka braktisur kurrë idenë se do të bëhet president. Ai është një ministër besnik, por mendon se ka të njëjtën staturë si Macron”, tha ai.
Le Maire 2.0
I diplomuar në shkollën prestigjioze të Francës për shkenca politike, L'École Nationale d'Administration, Le Maire e kaloi jetën e tij në korridoret e pushtetit, duke u ngjitur shpejt në radhët e qeverisë franceze për të mbajtur disa poste ministrore. Le Maire shërbeu si sekretar i shtetit për çështjet evropiane dhe ministër për bujqësinë nën ish-presidentin Nicolas Sarkozy, i cili i referohej atij si "Baby Bruno" - një referencë për një rival të mundshëm.
Folësi i rrjedhshëm i gjermanishtes gëzon gjithashtu një reputacion si njeri i kulturuar, i cili citon Aristotelin në konferenca shtypi dhe krenohet që është mik i shkrimtarit Michel Houellebecq. Në kohën e tij të lirë, Le Maire shkruan romane (thashethemet thonë se ai madje shkroi romane të lira romantike me pseudonimin "Duc Ëilliam" kur ishte student).
Pozicioni i tij i perceptuar global mund të jetë një aset në garën presidenciale të ardhshme. Ai ka krijuar një reputacion ndërkombëtar në kryeqytetet evropiane dhe në Bruksel, ku ka mishëruar qasjen ndërhyrëse të Parisit në politikën industriale. Lufta e tij e taksave ndaj kompanive amerikane Big Tech dhe gjuha e tij e ashpër kundër SHBA-së e bënë atë një lojtar kyç në marrëdhëniet e trazuara transatlantike.
Sondazhet tregojnë se Le Maire është ministri më popullor në qeverinë e Macron dhe se ai u bë edhe më i popullor pasi kaloi me sukses Francën përmes pandemisë së koronavirusit, kur mbrojti masat masive të ndihmës për të ndihmuar bizneset dhe konsumatorët të kalonin krizën.
Le Maire drejton një nga ministritë më të mëdha dhe më të rëndësishme të qeverisë, e cila përfshin industrinë dhe portofolet dixhitale, dhe si një nga të paktat pesha të rënda rreth Macron, ai është në pozicionin e parë për sukses.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
