Prostitucion në Elbasan, kapen dy kolumbiane dhe dy tutorët

Dy vajza kolumbiane janë vënë në prangat e policisë së Elbasanit, të akuzuara për prostitucion dhe krahas tyre edhe dy tutorët.

Në kuadër të operacionit u vunë në pranga shtetaset kolumbiane A. P., 20 vjeçe dhe A. R., 24 vjeçe, për ushtrim prostitucioni.

Gjithashtu, u arrestuan shtetasit A. T., 25 vjeç dhe Y. H., 43 vjeç, për shfrytëzim prostitucioni.

Bazuar në informacionet e siguruara nga inteligjenca policore, për një rast të ushtrimit të prostitucionit, në një apartament të marrë me qira, shërbimet e Policisë, në kuadër të operacionit të koduar “Fee”, kanë ushtruar kontroll në këtë apartament në të cilin u konstatuan dy shtetaset kolumbiane dhe shtetasit A. T. dhe Y. H.       

Aktualisht vijon puna për dokumentimin e rastit, identifikimin dhe kapjen e shtetasve të tjerë të përfshirë, ndërkohë që materialet i kaluan Prokurorisë Elbasan për ndjekje të mëtejshme.