Nomad Band, grupi më “in” i kryeqytetit, pesë të rinj të bashkuar nga muzika rock

Nomad Band është një nga grupet më të reja dhe më premtuese të skenës muzikore në Tiranë. 

I përbërë nga Maksimilian Myzeqari (vokalist), Sidrit Myrteli (baterist), Roelt Goxhabelliu (tastierist) dhe Henri Maliqati (kitarist), grupi po tërheq gjithnjë e më shumë vëmendje për performancat e tyre live dhe energjinë rock.

Të ftuar në studion e programit të mëngjesit “Zgjohu me MCN”, anëtarët e Nomad Band rrëfejnë se si u bënë bashkë përmes dashurisë për muzikën rock dhe si arritën të krijojnë një grup që sot po njeh sukses.

Maksimilian Myzeqari, vokalisti i grupit:
Grupi ka qenë si ide më përpara, por kënga e parë që prezantuam ishte në tetor.

Doja të eksperimentoja muzikalisht. U njoha fillimisht me Sidin, më pas me Roeltin dhe kështu u konsolidua formacioni i parë i Nomad Band. 

Më pas kishim nevojë për një kitarist dhe në grup u bashkua Henri, anëtari më i ri. 

Më herët kam qenë i angazhuar në projekte solo hip-hop, por shijen për rock-un e ka pasur që herët, të ndikuar nga prindërit.
Ajo që po bëj me çunat është shumë kreative dhe më përmbush artistikisht. Është një kombinim i asaj që kam bërë më parë me hip-hop dhe asaj që po ndërtojmë tani si grup rock.

Henri Maliqati, kitaristi:

Kitarën e kam dashur që i vogël. Për studimet për mjekësinë jam ndikuar edhe nga babai, që është mjek, dhe nga shkolla e mesme. 

Mendova se shkolla e muzikës nuk do të ishte 100% zgjidhja ime, ndaj zgjodha mjekësinë, por arti ka mbetur gjithmonë në shpirtin tim. 

Metali dhe kitara më kanë ndihmuar shumë. 

Sidrit Myrteli, bateristi:
Kam ndërruar disa grupe, por kjo ndodh shpesh. 

Në Shqipëri ka mungesë instrumentistësh, sidomos bateristë dhe basistë. Për këtë arsye jemi shpesh të kërkuar nga grupe të ndryshme.

Roelt Goxhabelliu, tastieristi:
Me Sidin u njoha përmes një kushëriri. Fillimisht folëm për muzikën, u bëmë shokë dhe më pas u bashkuam me Maksin. 

Nisëm këngën e parë, bëmë një pauzë dy mujore, por vendosëm të vazhdojmë sepse ideja ishte shumë e mirë.

Grupi aktualisht po punon për një album, një single të ri që pritet të ketë impakt të madh, si dhe disa cover-e të vjetër rap të ripërpunuar në stil rock.
Ndër këngët më të njohura nga publiku mbetet “Semafori”, e cila i ka bërë Nomad Band më të identifikueshëm në skenën muzikore.