Komisioni Qendror Zgjedhor ka publikuar sot rezultatet përfundimtare të zgjedhjeve të gjashtë tetorit në Kosovë.
Në bazë të këtyre rezultateve, Lëvizja Vetëvendosje është partia fituese duke vazhduar më pas me Lidhjen Demokratike të Kosovës si parti e dytë.
Kryetarja e KQZ-së, Valdete Daka, ka shpallur rezultatin e zgjedhjeve të gjashtë tetorit. “Janë statistikat e përgjithshme, numri i votuesve të regjistruar ka qenë një 1 milion e 961 mijë votues. Numri i votuesve që kanë votuar jashtë vendvotimeve është mbi 50 mijë dhe pjesëmarrja në votime është 44,72%. numri i pranuar i fletëvotimeve të vlefshme është 844.121 fletëvotime, të pavlefshme 25.485 fletëvotime”, ka thënë ajo.
Ndryshe Kryetarja e Komisionit Qendror Zgjedhor, Valdete Daka deklaroi se Vetëvendosjeje do të ketë 32 deputetë në legjislaturën e ardhshme të Kuvendit.
“Vetëvendosje 32 deputetë, LDK 29 deputetë, PDK do të ketë 25 deputetë, AAK-PSD koalicioni 100% Kosovë i takojnë 14 deputetë, Listës Serbe do t’i takojnë 10 deputetë, koalicioni VAKAT dy deputetë, Kosova Demokratike Turke parti do të ketë dy deputetë, Partia Liberale Egjiptiane dy deputetë, etj”, u shpreh Daka.
KQZ ka bërë të ditur edhe emrat e kandidatëve në bazë të partive të cilët kanë arritur të sigurojnë votat e mjaftueshme për t’u bërë pjesë e Kuvendit të Kosovës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
