Lukashenko bisedime me kreun e Wagner/ Prigozhin kthen mbrapsht trupat: Shmangim gjakderdhjen!

Yevgeny Prigozhin, shefi i grupimit mercenar Wagner, ka vendosur të kthejë mbrapsht trupat e tija dhe të mos avancojë drejt Moskës, pasi ka marrë sinjale se “do të ketë gjakderdhje masive” në të kundërtën, raporton BBC. Këtë, ia ka thënë Presidenti i Bjellorusisë, Alexander Lukashenko, i cili sipas agjencisë shtetërore të lajmeve bjelloruse, ka zhvilluar bisedime me Prigozhin gjatë gjithë ditës. Shërbimi i shtypit i Lukashenkos raporton se negociatat u zhvilluan me marrëveshjen e Vladimir Putin. “Prigozhin ka rënë dakord të ndalojë marshimin drejt Moskës dhe të ndërmarrë hapa të mëtejshëm për të de-përshkallëzuar situatën”, thuhet në deklaratë. Si pjesë e marrëveshjes, luftëtarët e Wagner marrin garanci sigurie. Çfarë tjetër iu ofrua Prigozhin dhe mercenarëve nuk është e qartë. Një raportim i agjencisë ruse të lajmeve TASS ka ardhur po ashtu, ku shpjegohet se Wagner do të kthehen në bazën e tyre, pasi kështu janë urdhëruar. Në 24 orët e fundit të tensionit, gjithçka ngjante si një grusht i mirëfilltë shteti, por sa duket nuk ka qenë i tillë! Vetë Prigozhin e ka njoftuar kthimin, përmes një videoje në platformën Telegram. Ai tha se ishte afruar rreth 200 kilometra në afërsi të Moskës, për të bërë të mundur mbijetesën dhe mos-shkatërrimin e grupimit të tij paramilitar Wagner. Ai ka pranuar se do të ketë negociata, për të shmangur gjakderdhjen mes rusëve. Por, termat e këtyre negociatave, ende nuk dihen. Zyra e shtypit e Lukashenkos ndërkaq ka bërë me dije se bisedimet kanë qenë të vështira dhe kanë zgjatur gjatë gjithë ditës. Ai po ashtu ka kontaktuar vazhdimisht me homologun e tij, Vladimir Putin, për të parë kushtet në të cilat Rusia ndodhet. Ujdia ishte ajo e ndalimit të menjëhershëm të marshimit të Wagner, kthimit të tyre në bazë dhe vendosja në gatishmëri e disa opsioneve shumë avantazhuese për grupimin paramilitar. Hapa të tjerë për të çtensionuar situatën do të ketë në vijim dhe do të bëhen të ditura.