Në hollin e Pallatit të Kongreseve në Tiranë po zhvillohen homazhe në nder të gjyqtarit Astrit Kalaja, i cili u vra dy ditë më parë gjatë ushtrimit të detyrës, brenda sallës së gjyqit në Gjykatën e Apelit.
Siç raporton gazetari Besmir Pula për “MCN Live”, që prej orës 09:00 personalitete të shumtë nga drejtësia, politika dhe institucionet e larta të shtetit kanë mbërritur për të nderuar figurën e gjyqtarit të ndjerë.
Mes të pranishmëve janë kryeministri Edi Rama, ministri i Drejtësisë, Aldo Ramallari, presidenti Bajram Begaj, kreu i SPAK Altin Dumani, si dhe përfaqësues të lartë të sistemit gjyqësor dhe prokurorisë. Gjithashtu, kolegë, miq dhe familjarë i japin sot lamtumirën e fundit gjyqtarit Kalaja, me nderimet që i takojnë figurës së tij.
Pas përfundimit të ceremonisë shtetërore në Tiranë, trupi i Astrit Kalasë do të dërgohet në qytetin e tij të lindjes, në Shkodër. Aty, në orët 14:00–16:00 do të zhvillohen homazhet e fundit përpara se ai të përcillet për në banesën e përjetshme.
Vrasja e gjyqtarit Kalaja është cilësuar si një ngjarje tronditëse, që ka truar jo vetëm sistemin e drejtësisë, por gjithë opinionin publik.
Një akt kriminal i kryer brenda një salle gjyqi, i cili ka nxjerrë në pah mangësitë e rënda të sistemit të sigurisë dhe të mbrojtjes së institucioneve të drejtësisë në vend.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
