Talebanët drejt kontrollit të plotë të Afganistanit, qeverisë i ka mbetur vetëm Kabuli

Talibanët janë drejt kontrollit të plotë të Afganistanit, ku në duart e qeverisë ka mbetur tashmë vetëm kryeqyteti Kabul. Të dielën militantët morën pa luftë kontrollin e Jalalabad, një qytet kyç në Lindje të vendit. Ai pasoi kapjen e bastionit verior të qeverisë të Mazar-i-Sharif vetëm një ditë më parë.

Kapja e Jalalabad do të thotë se talebanët kanë siguruar rrugët që lidhin vendin me Pakistanin.

Ajo erdhi disa orë pasi Mazar-i-Sharif-kryeqyteti i provincës Balkh dhe qyteti i katërt më i madh në Afganistan-gjithashtu ra kryesisht pa luftë.

Abas Ebrahimzada, një ligjvënës nga Balkh, i tha agjencisë së lajmeve Associated Press se ushtria kombëtare ishte e para që u dorëzua, gjë që më pas bëri që forcat pro-qeveritare dhe milicitë e tjera të dorëzoheshin. Kryengritësit tani kontrollojnë 23 nga 34 kryeqytetet provinciale.

Rrëzimi i shpejtë i forcave qeveritare e ka lënë Presidentin Ashraf Ghani nën presion në rritje për të dhënë dorëheqjen. Ai duket se përballet me një zgjedhje të ashpër mes dorëzimit ose luftës për të mbajtur kryeqytetin.

Shtetet e Bashkuara të Amerikës pas ngjarjeve të fundit të ndodhura në Afganistan  kanë nisur me tërheqjen diplomatëve nga ambasada e tyre në Kabul.

Mediat e huaja bëjnë me dije se evakuimi i shumicës së diplomatëve pritej të fillojë sot, ndërsa talebanët vazhdojnë përparimin e tyre që ka sjellë organizatën islamike në periferi të Kabulit brenda pak ditësh. Shtetet e Bashkuara kanë vendosur 5,000 trupa për të ndihmuar në operacion.

Çfarë po ndodh në Kabul?

Më shumë se një çerek milion njerëz janë zhvendosur nga luftimet dhe shumë prej tyre kanë kërkuar strehim në Kabul.

Disa që kishin ikur nga zonat e kontrolluara nga talebanët thanë se militantët atje po kërkonin që familjet të dorëzonin vajzat dhe gratë e pamartuara për t'u bërë gra për luftëtarët e tyre.

Muzhda, 35 vjeç, një grua beqare që iku nga Parwan në Kabul me dy motrat e saj, tha se do të merrte jetën e saj në vend që ta linte talebanët ta detyronin të martohej.

Gratë nga zonat e mbajtura nga talebanët kanë përshkruar gjithashtu se janë detyruar të veshin burka - vello një copë që mbulojnë fytyrën dhe trupin - dhe militantët raportohet se kanë rrahur njerëz për shkeljen e rregullave shoqërore.

Një 17-vjeçar, i quajtur vetëm si Abdullah, i tha agjencisë së lajmeve AFP se ai dhe familja e tij kishin ikur nga qyteti verior i Kunduz pasi u kap nga talebanët dhe tani po flinin nën një tendë në një park të Kabulit.

Ai tha se ai dhe të rinjtë e tjerë në Kunduz ishin detyruar të mbanin granata me raketa dhe municione të tjera për militantët.

Banorët e Kabulit kanë krijuar radhë të gjata në banka duke u përpjekur të tërheqin kursimet e tyre. Raportohet se disa degë tashmë kanë mbetur pa para.