Seanca në GJKKO për dosjen "Plumbi i Artë" ka shpërthyer me tensione të forta, debate dhe fyerje të ndërsjella mes palëve, ku ka pasur një incident të rëndësishëm ndërmjet prokurorisë dhe avokatëve mbrojtës.
Në këtë seancë, prokurori Behar Dibra është shprehur me fyerje ndaj avokatit Gentjan Rumano, duke e quajtur atë "idiot" dhe duke thënë "A mund ta ndërprisni se s’do dëgjojmë idiotësirat e këtij idioti."
Ky incident ka shkaktuar reagime të forta nga avokatët mbrojtës, dhe është një shembull i mungesës së etikës profesionale në procesin gjyqësor, vlerëson avokati Indrit Sefa, i ftuar në programin "MCN live".
Ai ka vlerësuar se jo vetëm në këtë rast, por edhe në praktikën e përditshme në GJKKO, po rritet një frymë negative ndaj institucioneve të avokatit dhe profesionistëve të mbrojtjes.
Në këto lloj procesesh, tensionet janë të larta, duke pasur parasysh rrezikshmërinë e çështjeve dhe presionin që avokatët përballen në mbrojtjen e klientëve të tyre. Çështjet janë shumë të ndjeshme dhe dënimet mund të jenë të rënda, duke i shtuar tensionet për të siguruar mbrojtje më të mirë për palët që ata përfaqësojnë.
Pavarësisht kësaj, nuk duhet të lejohet që procesi të kalojë në fyerje personale midis palëve. Në rastin konkret, prokurori ka kaluar kufijtë e etikës profesionale, pasi është e papranueshme që një palë të fyejë palën tjetër në një proces ligjor.
Sipas Sefës, prokurori nuk duhet të shohë procesin si një mundësi për të sulmuar individët, por si një detyrë për të mbrojtur interesin publik dhe të ushtruar akuzat në përputhje me ligjin.
Gjyqtari është ai që duhet të vlerësojë fajësinë ose pafajësinë e palëve dhe të sjellë një vendim të drejtë, pa pasur ndikime të jashtme.
Frymën negative ndaj profesionit të avokatit nuk e ndikon një individ i caktuar, por institucionin në tërësi.
Ka pasur praktika të reja të ndjekura nga GJKKO që nuk janë mësuar në shkollën e juridikut dhe se tani po bëhen normë.
Këto veprime procesuale që janë bërë tashmë praktikë, duhen trajtuar me kujdes dhe duhet të merren masa për të ruajtur etikën dhe respektin në proceset gjyqësore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
