Rusta: Vilson Bala në SPAK për aferën AKSHI-SHISH, mund të ketë edhe persona të tjerë

Ish-drejtuesja e SHISH, Vlora Hyseni, ka ankimuar masën e sigurisë “arrest në shtëpi”, duke kërkuar në apel heqjen e masës së vendosur ndaj saj. Ndërkohë, në kuadër të hetimeve që lidhen me dosjen AKSHI-SHISH dhe komunikimet e dyshuara me Ergys Agasin, në Prokurorinë e Posaçme është paraqitur edhe drejtori i Policisë së Korçës, Vilson Bala.

Gazetari Arsen Rusta, në një lidhje për “MCN Live”, deklaroi se Bala është thirrur në SPAK si person që ka dijeni dhe pritet të pyetet për kontaktet, bisedat telefonike dhe lidhjet që mund të ketë pasur me personat që janë në fokus të hetimit.

Drejtori i Policisë së Korçës, Vilson Bala, është paraqitur në Prokurorinë e Posaçme, ku pritet të merret në pyetje në kuadër të hetimeve për çështjen që lidhet me Ergys Agasin. Ai është thirrur si person që ka dijeni dhe do të pyetet për kontaktet dhe bisedat telefonike që mund të ketë pasur. Është një moment interesant për sa i përket të dhënave që mund të dalin nga hetimi, pasi tashmë në telefonin e Agasit, sipas të dhënave të hetimit, janë rikuperuar komunikime me Vlora Hysenin dhe pritet të shihet nëse në këto komunikime apo në elementë të tjerë të dosjes mund të rezultojë edhe emri i Vilson Balës.

Rusta solli në vëmendje edhe të shkuarën e Vilson Balës në strukturat e Policisë së Shtetit, duke theksuar se ai ka drejtuar më herët Policinë e Durrësit dhe aktualisht është në krye të Policisë së Korçës. Ai përmendi gjithashtu kallëzime dhe përplasje të mëparshme që lidhen me aktivitetin e tij në detyrë.

Vilson Bala ka qenë më herët drejtues i Policisë së Durrësit dhe aktualisht është drejtues i Policisë së Korçës. Ai është bërë i njohur edhe për përfshirjen në operacione të rëndësishme policore dhe për lidhjet e raportuara me drejtues të tjerë të Policisë së Shtetit. Tashmë ai ndodhet në ambientet e SPAK-ut dhe pritet të pyetet për atë që di në lidhje me kontaktet, komunikimet dhe marrëdhëniet që mund të kenë ekzistuar në kuadër të kësaj çështjeje.

Gazetari paralajmëroi se hetimi mund të zgjerohet edhe ndaj personave të tjerë, duke theksuar se mbetet për t’u parë se cilët do të thirren dhe në çfarë cilësie.

A do të ketë persona të tjerë, çfarë niveli do të kenë dhe kur do të vijnë, mbetet për t’u parë, por fakti që mund të ketë persona të tjerë të përfshirë është një pistë që tashmë po hetohet. Nuk përjashtohet mundësia e çdo personi që mund të ketë pasur lidhje me këtë aferë AKSHI-SHISH dhe pikërisht hetimi i komunikimeve, telefonave dhe dokumenteve pritet të tregojë se cilat janë lidhjet konkrete dhe nëse ka persona të tjerë që mund të merren në pyetje.

Sipas gazetarit, SPAK vijon hetimet për atë që ai e cilësoi si aferën AKSHI-SHISH, ndërsa për Hysenin pritet vendimi lidhur me ankimin e saj ndaj masës së sigurisë. Rusta tha se një nga arsyet e mbajtjes së masës “arrest në shtëpi” lidhet, sipas organit të akuzës, me rrezikun e ndikimit dhe mundësinë e largimit nga vendi.

SPAK vijon të ketë një hetim të thelluar për aferën AKSHI-SHISH, ku në arrest shtëpie ndodhet Vlora Hyseni, e cila tashmë ka kërkuar heqjen e masës së sigurisë. Pritet që SPAK të kërkojë vijimin e masës, ndërsa duhet të zbardhet edhe data e seancës së trupit gjykues. Rrezikshmëria për të ndikuar në pushtetin që kishte dhe rreziku i arratisjes janë ndër arsyet që janë parashtruar për vijimin e masës së arrestit në shtëpi.