Vranësira dhe reshje në pjesën më të madhe të territorit, parashikimi i motit sot

Këtë të shtunë, vendi ynë do të ndikohet nga kushte atmosferike relativisht të paqëndrueshme. 

Moti parashikohet me alternime kthjellimesh dhe vranësirash, të cilat në disa momente do të jenë të dendura.

Reshjet e shiut me intensitet të ulët do të nisin që në orët e para të mëngjesit në zonat juglindore, ndërsa gjatë mesditës dhe pasdites ato do të shtrihen në pjesën më të madhe të territorit. 

Në zona të veçanta priten edhe shtrëngata afatshkurtra. Era do të fryjë nga drejtimi veriperëndimor-perëndimor me shpejtësi mesatare rreth 6 m/s, ndërsa përgjatë vijës bregdetare dhe në zonat luginore pritet të arrijë deri në 14 m/s.

Në detin Adriatik dhe Jon parashikohet valëzim i ulët deri mesatar, me forcë 1-3 ballë.