Policia e Shtetit dhe Inspektorati i Përgjithshëm kanë nënshkruar një marrëveshje bashkëpunimi me synim forcimin e kontrollit ndaj ndërtimeve pa leje, krimeve mjedisore, punës së paligjshme dhe shkeljeve në tregun e punës, si dhe rritjen e sigurisë ushqimore, barnave dhe pajisjeve mjekësore.
Marrëveshja u firmos në ambientet e Drejtorisë së Përgjithshme të Policisë së Shtetit nga Drejtori i Përgjithshëm i Policisë, Drejtues Madhor Skënder Hita, dhe Kryeinspektori i Përgjithshëm, Dashnor Sula.
Palët theksuan se ky bashkëpunim synon forcimin e koordinimit institucional, rritjen e efektivitetit në inspektime dhe mbrojtjen e interesit publik.
Sipas marrëveshjes, Policia e Shtetit do të mbështesë inspektoratet në terren, veçanërisht në sektorë me risk të lartë, duke siguruar ndërhyrje të koordinuara në rast pengesash apo rezistence gjatë kontrolleve.
Po ashtu, parashikohet rritja e kapaciteteve përmes trajnimeve të përbashkëta dhe shkëmbimit të eksperiencave.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
