Zbardhet një vendim i tre muajve më parë i dënimit të dhënë në Shkallën e Parë ndaj Fredi Belerit. Bëhet fjalë për vendimin e shkallës së parë të gjyqësorit, pasi me vendimin e Apelit të GJKKO më 25 qershor, Beleri u dënua me dy vite burg për korrupsion në zgjedhje.
Ndërkohë vendimi në fjalë është dhënë më 26 prill nga gjyqtarja Elsa Ulliri, i cili i është dërguar vetëm këtë të enjte në burgun e Fierit, kryebashkiakut të zgjedhur të Himarës që ka të bëjë me një ankim të palës mbrojtëse.
Konkretisht pala mbrojtëse ka bërë kallëzim penal për deklarim të rremë të Arsen Ramës, i njohur bashkëpunëtori i policisë por edhe për veprën penale “Shpërdorimi i detyrës” nga ana e prokurorëve, gjyqtarëve dhe policia e Vlorës.
Kallëzimi nga mbrojtësit e Belerit është bërë për veprat penale “Falsifikimi i dokumenteve”, “Veprime që pengojnë zbulimin e së vërtetës”, “Korrupsioni aktiv i dëshmitarit, i ekspertit ose përkthyesit”, “Fillimi i paligjshëm i ndjekjes penale” dhe “Pengimi i subjekteve zgjedhore”, parashikuar nga nenet përkatëse të Kodit Penal.
Gjykata kundër Korrupsionit dhe Krimit të Organizuar, vlerëson se SPAK duhej të kishte analizuar dhe krahasuar dëshmitë dhe deklarimet e shtetasve Arsen Rama dhe Ermal Ajdini gjatë gjykimit të themelit si dhe deklarimet përkatëse të dhëna nga shtetasi Arsen Rama në fazën e hetimeve, me qëllim konkludimin nëse ndodhemi përpara deklarimit të rremë dhe falsfifikimit.
Gjykata vlerëson se nuk mund arrihej në një konkluzion pa kryer disa veprime verifikuese, si dhe kryerja e këtyre veprimeve të nevojshme në lidhje me verifikimin e pretendimeve të palës ankuese nuk konsiderohet ndërhyrje në pavarësinë e gjykatës. Konkluzioni i prokurorit se duhet të vendoset mosfillimi i procedimit penal për këtë shkak, pa kryer asnjë analizë të ekzistencës së veprës penale nuk është i bazuar në ligj.
Gjykata nuk e gjen të drejtë disponimin e organit të prokurorisë për mosfillimin e procedimit penal, dhe çmon t'i ngarkojë Prokurorisë së Posaçme si detyrë, në kuadrin e veprimeve procedurale që duhen kryer prej saj:
1.të administrohet dosja gjyqësore e hetimore penale në ngarkim të shtetasit Dhionisios Alfred Beleri, konkretisht dëshmitë e bëra nga shtetasit Arsen Rama dhe Ermal Ajdini;
2.aktet që pretendohet se janë falsifikuar si dhe deklarimnet që janë dhënë nga personat e kallëzuar përpara policisë gjyqësore;
3.vendimi gjyqësor i deklarimit fajtor të shtetasit Dhionisios Alfred Beleri, të hetohet dhe më pas të konkludohet në lidhje me pagesën e kryer nga policia në drejtim të shtetasit Arsen Rama si dhe të kryhet çdo veprim tjetër që mund të rezultojë i nevojshëm”.
Gjykata vlerëson se nga ana e SPAK, duhet të hetohet në drejtim të 4 veprave penale.
Në këto kushte, Gjykata vlerëson se vendimi i organit të akuzës pa trajtuar dhe analizuar sa më sipër, nuk është i drejtë dhe duhet të prishet.
Sa i përket pretendimit për kryerjen e veprës penale “Shpërdorimi i detyrës” nga prokurorët e posaçëm që kanë hetuar dhe përfaqësuar akuzën në ngarkim të ankuesit, Gjykata vlerëson se nuk qëndron, duke mos pranuar kërkesën e Fredi Belerit.
Konkretisht, kallëzuesi ka pretenduar se nga prokurorët e Posaçëm është mbajtur qëndrim i ndryshëm me raste të tjera të tyre, raste që kanë çuar për gjykim me akuzën e “Falsifikimi i dokumenteve”, bazuar pikërisht mbi të dhënat e tabulateve telefonike të personave nën hetim.
Gjykata vlerëson se pretendimet në lidhje me prokurorët nuk qëndrojnë, duke qenë se e gjitha procedura e ndjekur nga ana e tyre është verifikuar apo verifikohet nga gjykatat.
Për sa më sipër, për sa i përket pretendimeve që janë gjetur të drejta nga Gjykata, vlerësohet se ankimi i paraqitur nga pala ankuese për shfuqizimin e vendimit të mosfillimit është i bazuar në ligj dhe si i tillë duhet të pranohet vetëm në lidhje me ato shkaqe dhe pretendime, ndërsa për shkaqet e tjera të pretenduara nga pala ankuese, Gjykata çmon se nuk janë të bazuara në ligj dhe në prova.
Si rrjedhojë, ankimi i paraqitur nga pala ankuese duhet të pranohet pjesërisht.
Përfundimisht, Gjykata PËR KËTO ARSYE: Bazuar në nenet 290, 291, 379 dhe 384 të K.Pr.Penale
VENDOSI:
Pranimin e pjesshëm të ankimit.
Shfuqizimin pjesërisht të vendimit të Prokurorisë së Posaçme kundër Korrupsionit dhe Krimit të Organizuar “Për mosfillimin e procedimit penal, datë 11.03.2024, që i përket kallëzimit penal Nr.52/2024 dhe urdhërimin e Prokurorisë së Posaçme kundër Korrupsionit dhe Krimit të Organizuar për regjistrimin e procedimit penal dhe kryerjen e hetimeve të nevojshme sipas drejtimit të përcaktuar në pjesën arsyetuese të këtij vendimi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
