
Instituti i Gjeoshkencave (IGJEUM) në parashikimin e tij javor paralajmëron një javë me mot të ndryshueshëm, të karakterizuar nga reshje graduale.
Meteorologia Anira Gjoni, në një prononcim për "MCN Live", bëri me dije se duke nisur nga dita e nesërme do të kemi një ndërprerje të reshjeve të shiut, ndërkohë që fundjava rezervon rikthimin e tyre.
Reshjet e shiut që kanë nisur që prej mëngjesit do të na shoqërojnë përgjatë gjithë ditës së sotme dhe do të mbeten prezente deri në fund të ditës.
Pas ndërprerjes së reshjeve ditën e nesërme, moti i qëndrueshëm do të vijojë edhe në ditët pasardhëse:
• E enjte dhe e premte: Nuk parashikohet prezencë e reshjeve të shiut në të gjithë territorin.
• Fundjava: Rikthehen sërish reshjet, por me një intensitet të dobët.
Meteorologia Gjoni theksoi se muaji nëntor, në përgjithësi, do të jetë i shoqëruar me reshje shiu, të cilat do të jenë prezente pothuajse përgjatë të katër javëve të muajit. Megjithatë, ajo siguroi se nuk priten rreziqe apo problematika. “E rëndësishme është që nuk presim të kemi intensitete të shtuara të cilat mund të shkaktojnë problematika. Nuk kemi zona të cilat janë në rrezik si pasojë e këtyre reshjeve deri tani,” u shpreh Gjoni.
Sa i përket vlerave termike, temperaturat minimale do të regjistrojnë:
• Në zonat bregdetare: deri në 11°C.
• Në zonat e ulëta: deri në 8°C.
• Në zonat malore: deri në 8°C.
Ndërkohë, temperaturat maksimale pritet të pësojnë një rritje të lehtë, duke arritur vlerat nga 17°C deri në 18°C. Pavarësisht kësaj rritjeje të lehtë në ditët në vijim, nëntori mbetet muaji që hap zyrtarisht sezonin e temperaturave më të ftohta të vitit.
