Shpërthim në një aeroport të Pakistanit, dy të vrarë e dhjetëra të plagosur

Dy shtetas kinezë janë vrarë dhe të paktën 10 persona janë plagosur në një sulm të dyshuar vetëvrasës pranë aeroportit të Karaçit në Pakistan.

Një trup i tretë, ende i paidentifikuar zyrtarisht, mendohet të jetë ai i agresorit të sulmit, raporton BBC. 

Ambasada kineze në Pakistan tha se shpërthimi i së dielës mbrëma ishte një "sulm terrorist" që synonte një kolonë inxhinierësh kinezë që punonin në një projekt energjetik në provincën Sindh.

Ushtria Çlirimtare e Balochistanit (BLA), e cila vitet e fundit ka kryer sulme ndaj shtetasve kinezë të përfshirë në projektet e zhvillimit në Pakistan, mendohet se ka kryer sulmin.

Në një deklaratë të lëshuar të hënën, grupi militant tha se kishte "vënë në shënjestër një kolonë të nivelit të lartë të inxhinierëve dhe investitorëve kinezë" që mbërrinte nga aeroporti i Karaçit.