Rivlerësimi i masës së sigurisë, Gjykata e Krimeve të Rënda lë Tahirin në “arrest shtëpie”

Gjykata e Krimeve të Rënda ka lënë në fuqi masën “arrest shtëpie” për ish-ministrin e Brendshëm, Saimir Tahiri.

Ky i fundit, i shoqëruar nga avokati i tij dhe punonjës të policisë, u paraqit sot në seancën për për verifikimin e masës së sigurisë, para gjyqtares Liliana Baku, e cila dy ditë më parë pranoi pjesërisht kërkesën e Prokurorisë së Krimeve të Rënda, duke e lënë Tahirin në arrest shtëpie, ndryshe nga masa “arrest me burg” që kërkonte organi i akuzës.

Ndaj Tahirit u caktua masa e sigurisë “arrest shtëpie” tri ditë më parë nga Gjykata e Krimeve të Rënda. Vendimi ndaj tij erdhi vetëm pak ditë pasi vetë Tahiri hoqi dorë nga mandati i deputetit.

Gjykatësja Baku ka argumentuar masën e sigurisë me mungesën e rrezikshmërisë shoqërore, në rastin e Tahirit.

Ish-ministri i Brendshëm dyshohet për “trafikim të narkotikëve”, në bashkëpunim, në formën e grupit të strukturuar kriminal dhe “Korrupsion pasiv i funksionarëve të lartë shtetërorë ose i të zgjedhurve vendorë”.