Kryeministri Edi Rama iu rikthye sot daljeve live për situatën e koronavirusit në vend. Numri i madh i rasteve të reja, 82 të tilla në 24 orët e fundit, dhe më i larti që nga fillimi i pandemisë në vendin tonë, e detyruan kreun e qeverisë t’u rikthehet lidhjeve live në Facebook, nga ku u drejtohet qytetarëve.
Rama tha se do të ketë penalizime për të gjithë ata që shkelin rregullat.
“Nuk do të lejojmë më asnjë lloj grumbullimi, qoftë edhe politik. Liria e lëvizjes është e garantuar, e shprehjes nuk është vënë kurrë në diskutim. Grumbullimet nuk lejohen, Policia e Shtetit nuk do të bëjë asnjë lëshim. Kush merr pjesë në grumbullime do të penalizohet individualisht”, tha ai.
Rama kërkoi respektimin e rregullave nga të gjithë qytetarët.
"E kemi ditur dhe kemi thënë se numrat do të rriten. Pasojat janë gjëja më normale që ndodh pas hapjes. Që po u ndodh të gjitha vendeve, ku më shumë e ku më pak. Ju kam kërkuar, ju kemi kërkuar vijimisht të mirëkuptoni nevojën për një solidaritet të ri dhe respektimin e rregullave. Secili të respektojë rregullat. Me polici e ushtarë mund të kontrollosh mbylljen, por nuk mund të disiplinosh hapjen nëse qytetarët nuk bëjnë të gjithë secili detyrën e tyre të thjeshtë”, tha Rama.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
