Hunter Biden ka reaguar me indinjatë ndaj aktorit George Clooney për vënien në dyshim të mprehtësisë mendore të babait të tij gjatë garës zgjedhore të vitit 2024, një ndërhyrje që çoi në tërheqjen e Joe Biden.
Në një intervistë të mbushur me fjalë të pahijshme me kanalin televiziv në YouTube, Channel 5, me Andrew Callaghan, Biden i ri e akuzoi Clooney-n se e kishte ekzagjeruar brishtësinë e ish-presidentit.
Pasi u takua me Bidenin në një aktivitet për mbledhje fondesh në Los Angeles verën e kaluar, Clooney u bë një nga figurat e para demokrate që i bëri thirrje Joe Bidenit të tërhiqej nga gara.
Më pak se dy javë më vonë, Biden i moshuar njoftoi se do të tërhiqej duke ia lënë vendin kandidates së ardhshme demokrate, zëvendëspresidentes Kamala Harris.
Gara në nëntor u fitua nga kundërshtari i Harris, republikani Donald Trump.
Clooney u përfshi në fushatën presidenciale nëpërmjet një artikulli opinioni në New York Times në korrik 2024 me titull “E dua Joe Biden. Por na duhet një kandidat i ri”.
Aktori shprehu mbështetje për agjendën e presidentit, por vuri në dukje shqetësimet për debatin e tij katastrofik kundër Trump, në të cilin ai u pengua në fjalët e tij.
Në intervistë, Biden i ri ia hodhi fajin një agjende të ngjeshur udhëtimesh dhe marrjes së ilaçit Ambien, i njohur edhe si zolpidem, i cili përdoret për të trajtuar problemet e gjumit.
“I japin Ambien që të flejë. Ai ngjitet në skenë dhe duket si një dre nën dritat e përparme”, tha ai.
Në artikullin e New York Times, Clooney tha se takimi me Bidenin në eventin bamirës tregoi se ai ishte “i njëjti njeri që të gjithë pamë në debat”.
Ai shtoi: “Ne nuk do të fitojmë në nëntor me këtë president.”
Gjatë intervistës së publikuar të hënën, komentet e para të gjata të Hunter Biden që nga zgjedhjet, djali i ish-presidentit e mohoi këtë rrëfim dhe tha se Clooney ishte “përpjekur t’i priste gjunjët një presidenti në detyrë”.
I pyetur pse Clooney ndërhyri në garë, Hunter Biden u përgjigj me një sërë fjalësh të pista për aktorin.
“Shkoftë në djall ai dhe të gjithë përreth tij. Çfarë lidhje ke ti me çdo gjë. Pse duhet të të dëgjoj?” tha ai në një mesazh drejtuar Clooney-t.
Biden ngre dyshimin se Clooney ishte i motivuar nga mospajtimi mbi qëndrimin e ish-presidentit ndaj Izraelit.
Gruaja e Clooney-t, Amal, ishte në një panel ligjor i cili rekomandoi që Gjykata Ndërkombëtare Penale të lëshonte një urdhër arresti për kryeministrin izraelit Benjamin Netanyahu për shkak të luftës në Gaza.
Por Presidenti Biden e hodhi poshtë idenë, duke e quajtur në një moment urdhrin e arrestit “të pakëndshëm”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
