Kontrollet intensive të policisë në territorin e Kurbinit dhe Mirditës kanë çuar në goditjen e tre rasteve të kultivimit të bimëve narkotike, pas operacioneve të zhvilluara nga toka dhe ajri, përmes përdorimit të dronëve.
Bazuar në informacionet e siguruara në rrugë operative dhe verifikimet në terren, shërbimet e Komisariatit të Policisë Mirditë, Komisariatit të Policisë Kurbin dhe Seksionit për Hetimin e Narkotikëve në Drejtorinë Vendore të Policisë Lezhë kanë identifikuar tre parcela të kultivuara me bimë të dyshuara narkotike Cannabis Sativa.
Si rezultat i operacionit, u arrestuan në flagrancë tre shtetas, ndërsa u asgjësuan gjithsej 436 bimë narkotike.
Në fshatin Sheshaj, Mirditë, shërbimet e policisë arrestuan shtetasin Jetmir Rrucaj, 21 vjeç, banues në Durrës, pasi u kap duke u kujdesur për 222 bimë të dyshuara narkotike Cannabis Sativa të kultivuara në këtë zonë.
Ndërkohë, Seksioni për Hetimin e Narkotikëve në DVP Lezhë, në bashkëpunim me specialistët e Komisariatit të Policisë Kurbin, arrestuan shtetasin Dritan Nikolli, 47 vjeç, banues në Fshat Laç, Kurbin. Gjatë kontrollit, ai u kap duke u kujdesur për 151 bimë të dyshuara narkotike.
Rasti i tretë u godit në lagjen “Rrahu i Pashës”, Laç, ku specialistët për Hetimin e Krimeve të Komisariatit të Policisë Kurbin arrestuan shtetasen Vosava Mercina, 44 vjeçe. Në këtë zonë u gjetën 63 bimë të dyshuara narkotike Cannabis Sativa, për të cilat dyshohet se kujdesej ajo.
Bimët narkotike të sekuestruara u asgjësuan me anë të djegies, ndërsa materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
