Beogradi merr kthesë në deklaratat për Kosovën. Në një intervistë për të përditshmen serbe Danas, Ministri i Jashtëm i Serbisë, Ivica Daçiç ka deklaruar se të premten do të ketë një takim me ministrin e Brendshëm Nebojsha Stefanoviç për të diskutuar qëndrimin e Beogradit në takimin e Interpolit në Kinë, që pritet të mbahet në shtator.
” Situata me anëtarësimin e Kosovës në UNESCO është më e komplikuar nga pranimi në Interpol. Është e qartë se Kosova për t’u anëtarësuar në UNESCO nuk ka më shumë se dy të tretat e votave, ndryshe është situata e mbështetjes për anëtarësimin në Interpol”- deklaroi Ministri i Jashtëm i Serbisë.
“Një mbledhje e rëndësishme e Interpolit mbahet në shtator në Kinë. Përveç Kosovës, anëtarësim kanë kërkuar edhe Palestina dhe Ishujt Solomon. Si mund të themi, votoni për Palestinën, por jo edhe për Kosovën” -deklaroi shefi i diplomacisë serbe për të përditshmen “Danas”.
Qëndrimet e Serbisë për Kosovën kanë ndryshuar pas takimit në Bruksel të Presidentëve të dy vendeve respektive .
Pak ditë më parë edhe Presidenti i Serbisë shpjegohej para popullit të tij pse duhet të mbështeste bisedimet me Kosovën, duke e gjykuar vendimtare këtë për të ardhmen e vendit.
Shkrimin e Presidentit serb e shpërndau edhe Kryeministri Edi Rama në faqen e tij në facebook, të shoqëruar me një shënim ku shkruhej se pak vite më parë nuk mund të imagjinohej një shkrim i tillë nga Aleksandër Vucic, presidenti i sapozgjedhur i Serbisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
