Bala: Xhamia e Namazgjasë nuk është ndërtuar në truall Hallall për të. Objekt politik për Turqinë (VIDEO)

Përfaqësuesi i familjes Kruja, Alban Bala, të cilët pretendojnë se Xhamia e Namazgjasë është ndërtuar në truall të marrë në shkelje të marrëveshjes mes tyre dhe Komunitetit Mysliman Shqiptar, tregon historinë e pronës.

Ai tha për “MCN Informacion” se në vitin 1938 gjyshi i tij e bleu këtë truall nga familja Toptani dhe se trualli shtrihej deri në breg të Lanës, por më pas u ndërtua rruga.

Bala shpjegon se në vitin 1994 toka u rikthye në pronësi të plotë të familjes Kruja dhe më pas mbas vendimit për tu ndërtuar xhami në 1994 zona nuk u zhvillua.

Prej asaj kohe historia deri në 2014 ka vazhduar, por mes Komunitetit Mysliman dhe familjes Kruja u arrit një marrëveshje për lëshimin e një pjese që familja Kruja i jepte KMSH.

KMSH i dhuroi qeverisë një muze, por qeveria zhvlerësoi vlerën e metrit katror të tokës në 400 euro, gjë që ishte vjedhje.

Ne e refuzuam këtë, por asnjëherë nuk kërkuam bllokimin e ndërtimit të xhamisë.

E mbështetëm ndërtimin e xhamisë, por kërkuam që të shpronësohemi me vlerën e tregut.

Përurimi i vatrës kulturore turke të qeverisë Erdogan, nuk përfshin as qeverinë shqiptare dhe as popullin shqiptar.

Ne nuk kemi dhënë miratimin për ndërtimin e xhamisë. Xhamia nuk është ndërtuar në një truall që është Hallall për të.

Në marrëveshjen e vitit 2013 mbi të cilin bazohet leja e ndërtimit, parashikohet që Komuniteti Mysliman Shqiptar dhe familja Kruja të ndërtonim krah njëra tjetrës dhe familja Kruja i falte 700 metra katrorë xhamisë, në mënyrë që të dilte sa më mirë.

Dhe iu lutëm studios arkitekturore që ta projektonin ata dhe godinën tonë. Godina që u miratua kishte më pak se 10 mijë metra katrorë.

Ajo që ndodhi ishte prishja e lejes, xhamisë iu hoq leja ashtu si dhe ne. Ofertën për ndërtimin e Muzeumit e bëri KMSH dhe më pas u mor aprovimi nga qeveria që të ndërtohej xhamia.

Ne kemi 10 vite në gjyq dhe kërkojmë në gjyq shpërblimin e tokës me çmimin e tregut si dhe kërkojmë një falje morale.

Ajo që është e dhimbshme është se KMSH e dinte se ishte një pronë e një besimtari mysliman që e kishte trashëguar.

Por KMSH dhunoi çdo parim, pranoi të vidhte në bashkëpunim me shtetin duke u fshehur pas gishtit. Jo nuk e kam vjedhur unë, por e ka vjedhur shteti.

Nuk e bën xhami një vend se hyn brenda një mysliman, një gjë e ndotur nuk mund të jetë e pranueshme.

Gjykata e Lartë e ka kthyer çështjen për rigjykim në Apel. Nga Gjykata Kushtetuese nëse nuk marrim një përgjigje pozitive, do i drejtohemi Strasburgut.

Presidenti Erdogan është vënë në dijeni që toka nuk është Hallall, por nuk kanë kthyer përgjigje. Se për ta nuk është xhami, por objekt politik për Turqinë.

Interesi i tij është politik, ai ka ndërtuar xhaminë më të madhe në Ballkan. Për të është gur themeli kufitar, nuk ka lidhje me xhaminë.