I hapet rruga krijimit të Akademisë së Pushtetit Vendor, do të trajnohen 26 mijë punonjës

Me vendim të Këshillit të Ministrave çelet rruga për krijimin e Akademisë së Pushtetit Vendor, që pritet të trajnojë në tre vite 26, 097 punonjës. 

Kostoja e investimit fillestar pritet të mbulohet 100 për qind nga ekzekutivi. Në tre vitet e para kostoja do ndahet, 50 për qind nga qeveria qendrore dhe 50 për qind nga pushteti vendor. 

Ministri i Shtetit për Pushtetin Vendor Arbjan Mazniku, në një postim në rrjetet sociale thotë se për herë të parë Bashkitë e Shqipërisë do të mund të themelojnë një institucion të përbashkët që do të ofrojë trajnime të vazhdueshme për administratën vendore.

“50% e kostos në 3 vitet e para për punën e Akademisë do të mbulohen nga qeverisja qendrore dhe Bashkitë do të përfitojnë trajnime, zhvillim profesional të qëndrueshëm dhe forcim të kapaciteteve të tyre profesionale për dhënien e shërbimeve cilësore e të standardeve europiane për qytetarët”, shkruan Mazniku.