Një grua zgjohet nga koma pas 27 vjetësh

Një grua nga Emiratet e Bashkuara Arabe, e cila i dëmtua rëndë në një aksident rrugor në vitin 1991 ka rimarrë veten, duke u zgjuar si prej një mrekullie nga koma 27-vjeçare.

Munira Abdulla, ishte 32 vjeç kur u aksidentua dhe u dëmtua rëndë në tru.

Ajo po udhëtonte me makinë për të marrë djalin e saj nga shkolla dhe u përplas me një autobus.

Omar Webair, atëherë 4 vjeç, ishte i ulur në ndenjësen e pasme, por nuk pësoi asgjë pasi e ëma e përqafoi pak para aksidentit.

Vitin e shkuar ajo erdhi në vete në një spital gjerman.

Omari  ka dhënë një intervistë në një nga gazetat arabe, në të cilën tregon edhe progresin e së ëmës.  

“Nëna ime ishte pranë meje në ndenjësen e pasme dhe më përqafoi menjëherë teksa përplasja po ndodhte... Ajo më përqafoi që të më mbronte... Unë nuk hoqa dorë asnjëherë prej saj, pasi gjithmonë e kisha një ndjesi se ajo mund të zgjohej... Arsyeja pse e tregoj këtë histori është se dua t’u them njerëzve të mos e humbasin shpresën për njerëzit e tyre të dashur. Të mos i konsiderojnë të vdekur nëse janë në një gjendje të tillë...”, është shprehur ai.

Zonja Abdulla pas aksidentit u dërgua në spital në Londër, ku u deklarua se qe në gjendje vegjetative por e ndjeshme ndaj dhimbjes.

Më pas u kthye në vendin e lindjes. Në vitin 2017 u dërgua në Gjermani ku iu nënshtrua një sërë operacionesh, fizioterapisë dhe mjekimeve për të përmirësuar gjendjen e saj shëndetësore.

Një vit më vonë i biri u përfshi në një zënkë në spital, çka me sa duket bëri nënën të lëvizë.

Omari tha se në dhomën e spitalit pati një keqkuptim, dhe frika e rrezikut me sa duket e tronditi nënën.

Ajo filloi të lëshonte zëra të çuditshëm dhe pas tre ditësh e thirri djalin në emër.

“Ishte ajo! Fluturoja nga gëzimi,,, e kisha ëndërruar prej vitesh...” u shpreh djali.

Tani ajo është më reaguese, mund të ndjejë dhimbjen dhe të bëjë ndonjë bisedë.

Ajo është kthyer në Emirate dhe vazhdon të ndiqet nga mjekët të cilët po e trajtojnë me fizioterapi për përmirësimin e qëndrimit të saj ndenjur dhe për të parandaluar kontraktimin e muskujve.

Raste si të zonjës Abdulla janë shumë të rralla.