Gazetari Sokol Bregu, në MCN Live, ka komentuar zhvillimet e fundit lidhur me kontrollet e kryera nga Byroja Kombëtare e Hetimit (BKH) në dy vila në zonën e Palasës, që dyshohet se lidhen me Agasin, në kuadër të hetimeve të SPAK për çështjen e AKSHI-t.
Sipas Bregut, këto veprime hetimore lidhen drejtpërdrejt me kërkesën e prokurorisë për shtyrjen e afatit të hetimeve, për shkak të kompleksitetit dhe volumit të madh të dosjes.
Mendoj se këto kontrolle janë bërë për arsyen e shtyrjes së afatit dhe prokuroria i ka kërkuar gjykatës shtyrjen e afatit edhe për disa muaj të tjerë, duke qenë se dosja e AKSHI-t është shumë voluminoze dhe kërkon kohë për shkak të detajeve që përmban.
Ai shtoi se kontrollet e BKH-së janë pjesë e një procedure standarde hetimore, që synon verifikimin e mundshëm të sendeve apo gjurmëve të mbetura, pavarësisht kohës së kaluar.
Në çdo moment BKH bën kontrollet e saj për fshehje të sendeve. Nuk mendoj se ka prova të lëna pas kaq kohësh, por gjithsesi kontrolli bëhet me idenë se mund të ketë ndonjë gjurmë, sidomos nëse personi ka qëndruar aty gjatë kohës që ka qenë në kërkim.
Gazetari nënvizoi gjithashtu se këto veprime janë në vijim të një procesi aktiv hetimor, duke shtuar se Agasi ndodhet në Shqipëri dhe nuk rezulton të ketë dalë jashtë vendit.
Ndërkohë, Bregu komentoi edhe një element tjetër të çështjes, duke iu referuar ndryshimit të sjelljes së një personazhi të përfshirë në hetim, nga një gjendje e shqetësuar në një qëndrim më të sigurt në paraqitjet publike.
Zhvillimet e fundit pritet të hedhin më shumë dritë mbi një nga dosjet më të ndjeshme që po hetohen aktualisht nga SPAK, ndërsa mbetet për t’u parë nëse kontrollet e fundit do të prodhojnë elementë të rinj provues.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
