Zjarr në një pallat në Francë, 10 të vdekur, mes tyre 5 fëmijë

Dhjetë persona, përfshirë pesë fëmijë, kanë humbur jetën në një zjarr në një pallat pranë Lionit të Francës, thotë qeveria lokale.

Zyrtarët lëshuan një deklaratë duke thënë se një "zjarr i madh" shpërtheu në një bllok apartamentesh shtatëkatëshe në Vaulx-en-Velin.

Katër persona janë në gjendje kritike dhe 10 të tjerë raportuan lëndime të lehta, duke përfshirë dy zjarrfikës. Zjarri është shuar nga 170 zjarrfikës.

Ministri i Brendshëm, Gerard Darmanin, tha se shkaku i zjarrit nuk dihet ende dhe vlerësoi punën e zjarrfikësve që shpëtuan njerëzit në "kushte jashtëzakonisht të vështira".

Ai shtoi se fëmijët që vdiqën ishin të gjithë të moshës nga tre deri në 15 vjeç. Z. Darmanin tha se një hetim mbi atë që shkaktoi zjarrin do të nisë më vonë të premten.

Një banor i zonës tha për gazetën Le Progres de Lyon se: "Më zgjuan nga britmat... Ne donim të ndihmonim njerëzit, por tymi ishte shumë i rëndë. Pashë një grua të vdekur... Është dramatike."

Blloku i banesave ku shpërtheu zjarri është pjesë e një projekti banimi në periferi të Lionit. Flakët duket se kanë nisur në katin përdhes përpara se të përhapeshin lart.

Lagjja ka pasur një reputacion të dobët për problemet e prishjes urbane dhe krimit, por po i nënshtrohet një rinovimi prej shumë milionë eurosh.