Prokuroria e Durrësit ka urdhëruar regjistrimin e një procedimi penal pas përmbytjeve të shkaktuara nga reshjet e shiut më 6 dhe 7 janar në qytet dhe zonat përreth.
Reshjet e dendura bënë disa rrugë të pakalueshme, ndërprenë qarkullimin e mjeteve dhe shkaktuan dëme materiale në banesa dhe objekte private.
Nga hetimet paraprake rezulton se si pasojë e situatës ka humbur jetën shtetasi A.H., punonjës i Ndërmarrjes Komunale Plazh, i cili ishte duke verifikuar situatën në zonat e përmbytura dhe dyshohet të jetë marrë nga rrjedha e ujit.
Prokuroria ka dyshime për ekzistencën e veprave penale: “Shpërdorimi i detyrës”, “Shkatërrimi i pronës me përmbytje”. “Shkatërrimi i pronës nga pakujdesia”.
“Të kryhet regjistrimi i procedimit penal për veprën penale “Shpërdorimi i detyrës”, “Shkatërrimi i pronës me përmbytje” dhe “Shkatërrimi i pronës nga pakujdesia” të parashikuar nga neni 153, 161 dhe 248 i Kodit Penal”, thuhet në njoftimin e Prokurorisë së Durrësit.
Urdhri për regjistrimin e procedimit penal synon hetimin e shkaqeve të përmbytjeve dhe individualizimin e përgjegjësisë për dëmet e shkaktuara, si në pronën private, ashtu edhe në infrastrukturën publike.
“Ka dyshime se nga personat e ngarkuar me funksione, të cilat kanë për detyrë menaxhimin e situatës janë kryer veprime ose mosveprime që përbëjnë mospërmbushje të rregullt të detyrës, duke dëmtuar rëndë interesat e shtetasve dhe personave juridikë dhe kanë sjellë edhe pasojat e rënda të evidentueshme dhe të matshme mbi të mirat pasurore si edhe në jetën e një personi i cili ka humbur jetën”, thuhet ndër të tjera në njoftim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
