Forumi ministror Bashkimi Evropian- Ballkani Perëndimor do të mbahet në Tiranë në datat 3 dhe 4 nëntor, me pjesëmarrjen e ministrave të drejtësisë dhe të punëve të brendshme nga rajoni.
Ministri i Drejtësisë, Ulsi Manja bëri të ditur sot se Presidenca e Republikës së Çekisë në Këshillin e Bashkimit Europian ka zgjedhur Shqipërinë për të organizuar ministerialin “Për Drejtësinë dhe Çështjet e Brendshme” që do të zhvillohet në Tiranë përgjatë dy ditëve.
Në një postim në rrjetet sociale Manja shprehet se, Bashkimi Europian dhe Ballkani Perëndimor shfrytëzojnë këto takime të rëndësishme për të forcuar lidhjet mes tyre, e për të thelluar bashkëpunimin në këto fusha të rëndësishme.
Prania e Komisionerit për Drejtësinë i BE Didier Reynders, ministrit çek të Drejtësisë Pavel Blazek, si dhe përfaqësuesve të tjerë nga institucione të drejtësisë në BE, janë mesazh i qartë për vëmendjen, prioritetin dhe interesin e Bashkimit Europian kundrejt Ballkanit Perëndimor në fushën e Drejtësisë.
Tema e parë në seksionin kushtuar punëve të brendshme do të jenë çështjet e sigurisë që lidhen me luftën në Ukrainë dhe ministrat e brendshëm do të informohen për zhvillimet më të fundit në fushën e migracionit, azilit dhe menaxhimit të kufirit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
