Kryeministri Edi Rama ka mbajtur sot një qëndrim skeptik ndaj punës së SPAK gjatë dëgjesës parlamentare të thirrur nga Klotilda Bushka.
Gazetari Mariglen Kume, në një intervistë për "MCN live", theksoi se Rama bëri të qartë se për aq kohë sa ai do të jetë në krye të Partisë Socialiste, ai nuk do të heshtë përpara veprimeve jo të ligjshme të institucioneve të drejtësisë dhe verifikimit nga ILD-ja.
Rama ka bërë thirrje për Inspektoriatin e Lartë të Drejtësisë (ILD) që të verifikojë dosjet e gjyqtarëve që janë të përfshirë në dosjen e Erion Veliajt. Sipas tij, mazhoranca socialiste kërkon një luftë pa kompromis kundër korrupsionit, por për këtë është e nevojshme që të zbatohen disa standarde të caktuara.
Kryeministri theksoi se reforma në drejtësi duhet të funksionojë si një mekanizëm kontrolli, jo vetëm për të marrë vendime, por për të siguruar që ligji zbatohet në mënyrë të drejtë dhe të barabartë.
Sipas tij, Inspektoriati i Lartë i Drejtësisë duket se është "në gjumë", dhe e kritikoi për mos veprim, ndërsa theksoi se është e nevojshme që të ketë një hetim dhe verifikim të mëtejshëm mbi aktivitetin e prokurorëve dhe gjyqtarëve.
Në lidhje me SPAK, Rama u shpreh se disa individë janë ndjerë të intimiduar nga proceset hetimore dhe se kjo mund të ndikojë në mënyrën si ata marrin vendime. Ai kërkoi që Prokuroria e Posaçme të krijojë një standard të qartë dhe të drejtë për të gjithë, pa e lejuar asnjëherë që të ndodhin shkelje të ligjit.
Kryeministri gjithashtu theksoi se mandati i tij është një mandat për drejtësi me standarde të larta dhe se duhet të sigurohet që çdo institucion të veprojë brenda kornizave të ligjit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
