I vetmi i dënuar nga dosja me dhjetra të dyshuar është administratori i kompanisë Dunwell Haberman LLC, Avdjol Dobi. Në korrik të vitit 2020, gjykata vendos ta dënojë me 9 muaj për akuzën e falsifikimit të dokumentave, dënim që konvertohet në 6 muaj për shkak të pranimit të gjykimit të shkurtuar.
2 muaj më pas, Gjykata e Apelit le në fuqi të njëjtin vendim, por me një ndryshim: urdhëron aplikimin e nenit 59 të Kodit Penal duke kthyer vuajtjen e dënimit nga burg në shërbim prove për 1 vit, me kushtin që të mos kryejë vepër tjetër penale në këtë periudhë.
Argumentet e avokatit mbrojtës të Avdjol Dobit se ai ishte në moshë të vogël dhe nuk kishte kryer më parë vepra penale, e bindën trupën e gjyqtarëve të mos e çojnë në burg.
“Të mbahen parasysh rrethanat lehtësuese si dhe fakti se është i padënuar më parë, në moshë të re, ka pranuar fajësinë dhe është penduar.” u shpreh avokati gjatë seancës.
Hetimi i Prokurorisë arriti të provojë vetëm akuzën e falsifikimit të dokumentave, jo të mashtrimit, vepër e kallzuar nga Autoriteti Rrugor dhe e regjistruar nga Prokurori i çështjes. Edhe pse Dobi arriti të mashtrojë dhjetra zyrtarë dhe dy institucione për të përfituar 30 milion euro, pushimi i kësaj akuze nuk argumentohet fare në vendimin e prokurorisë. Prokuroria nuk ka kryer hetim as mbi noteren Xhevahire Brahaj e cila ka njehsuar si origjinale aktin e regjistrimit, firmën e Sekrtearit të Delaware dhe bilancet e firmës DH Albania.
“Mbrapa gjithë kësaj skeme nuk është vetëm administratori i kompanisë, por janë persona të tjerë të lidhur drejtpërdrejt me politikën”, thotë avokati Redi Ramaj.
Nga 21 zyrtarët e pyetur dhe dyshuar në këtë hetim për kontrata me vlerë 30 milion euro, askush nuk u morr i pandehur.
Prokuroria shqyrtoi fillimisht dokumentacionin e Komisionit të Dhënies së Licencave Profesionale të Zbatimit në Ndërtim në Ministrinë e Infrastrukturës dhe Energjisë. Por edhe pse konstatoi se një pjesë e tyre nuk ishin dorëzuar me vulë nga ana e firmës DH Albania, nuk konstatoi shkelje apo veprën e shpërdorimit të detyrës nga punonjësit shtetërorë.
Disa anëtarë të këtij komisioni janë promovuar më pas në detyra të larta pas mbylljes së hetimeve. Kryetarja e Komisionit, Gerta Lubonja, vijon të mbajë detyrën e drejtores së Agjencisë të Menaxhimit të Burimeve Ujore, ndërsa një tjetër antar, Enea Karakaçi, është emëruar drejtor i Agjencisë të Burimeve të Rinovueshme.
Edhe zyrtarët e Operatorit të Sistemit të Transmetimit shpëtuan nga ndjekja penale. Kontrata me kompaninë DH Albania ishte firmosur dhe një pjesë e fondeve kishin kaluar në llogarinë e kompanisë DH Albania, por në mënyrë enigmatike paratë u kthehen sërish në llogarinë e OST-së, duke i dhënë argument prokurorisë se nuk ka ndodhur dëmi ekonomik.
Titullari i këtij institucioni, Klodian Gradeci, lirohet nga detyra disa javë më pas dhe arrestohet për një tjetër çështje, por kryetari i Komisionit të Ofertave në këtë tender, Bledian Dalipi drejton sot kompaninë OSSH duke u bërë një nga administratorët më të rëndësishëm të firmës shtetërore të shpërndarjes së energjisë elektrike.
“Marrin poste publike më të larta për të siguruar imunitet, duke i bërë të gjitha raportet dhe auditet inefiçente”, thotë drejtori i Qendrës për Kërkime Ekonomike, Zef Preçi.
Një investigim i BIRN zbulon se si një punonjës i firmës shqiptare të ndërtimit Gener 2 kishte paguar nga llogaria e kompansië tarifën 150 lekë për regjistrimin në Qendrën Kombëtare të Biznesit për kompaninë DH Albania.
Asnjë përfaqësues i kësaj firme nuk rezulton të jetë pyetur qoftë edhe si person që ka dijeni për hetimin.
Por edhe pse kompania nuk u hetua nga prokuroria, për Gener 2 nisi ndëshkimi politik.
Në janar të vitit 2019, ministrja e sapoardhur në detyrë, Belinda Balluku revokon kontratën koncesionare për rrugën Thumanë – Kashar të firmosur mes ministrisë dhe kompanisë Gener 2.
2 vjet më pas, nisur nga një ankimim i depozituar nga firma e ndërtimit, Gjykata Administrative e Apelit urdhëron Ministrinë e Infrastrukturës dhe Energjisë që të dërgojë për vendim në Këshillin e Ministrave kontratën. Vendimi u pranua, pa shfrytëzuar shkallën e gjykimit në Gjykatën e Lartë dhe qeveria miratoi kontratën në verën e vitit të shkuar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
