Kryeredaktori i lajmeve në MCN TV, Leonard Mitro, thotë se akuza e ngritur nga SPAK për drejtoreshën e AKSHI-t, nëndrejtoreshën dhe gjashtë persona të tjerë duhet të ishte bërë shkak për thirrjen e Këshillit të Sigurisë Kombëtare nga kreu i shtetit.
Në një analizë në studion e MCN Informacion, Mitro tha se heshtja e kryeministrit Rama lidhur me këtë rast ngre shumë pikëpyetje.
Është një nga skandalet më të rënda që po i ndodh qeverisë së kryeministrit Rama. Për t’i mbetur prezumimit të pafajësisë, por duke analizuar cilësimin që SPAK i ka bërë këtij grupi si i strukturuar kriminal, atëherë nëse një grup i tillë ka në dorë sistemet tona të të dhënave personale, sistemet tona të sigurisë, të pronës, etj., atëherë jemi në kushtet e cenimit të sigurisë kombëtare. Gjithmonë pa marrë në analizë nëse ky cilësim nga SPAK-u mund të jetë joproporcional. Kemi një akuzë të SPAK për një grup të strukturuar kriminal, ku përfshihen zyrtarë dhe ish-zyrtarë që me kohën janë bërë biznesmenë dhe klientë të AKSHI-t.
Në këto kushte, presidenti mund të thërriste Këshillin e Sigurisë Kombëtare për të kuptuar përmasat e këtij skandali. Kryeministri Rama, i cili ka folur për reformim të shërbimeve digjitale, deri tani ka heshtur. Kjo shton dyshimet lidhur me përmasat e këtij skandali. Nga opozita janë artikuluar akuza që mund të preken edhe njerëz shumë afër zotit Rama.
Mitro tha më tej se në kushte normale, do të ishte e pamundur që qeveria të vijonte punën pas skandaleve të tilla.
Një vit më parë u fol për luftë kibernetike, ndërhyje të Iranit në arkitekturën tonë të sigurisë kibernetike. Këto mund të jenë arsye që e kanë stepur zotin Rama, por do të presim hetimet se deri ku do të shkojnë. Duke qenë se akuza është grup i strukturuar kriminal, ky grup mund të preket edhe nga Ligji Antimafia.
Kur vetë shteti, nëse provohen pretendimet se punonjës dhe zv.drejtori i Policisë së Tiranës është i implikuar në pengmarrjen e biznesmenit, atëherë përgjegjësia mund të shkojë edhe më lart se zonja Karçanaj. Nuk mund ta themi a ka pasur mbrojtje politike, ndoshta mund të themi se ajo ka pasur besueshmërinë e plotë të kryeministrit. Por nuk mund të themi nëse ka vepruar e pavarur me një grup njerëzish që e kanë futur në një qark lidhjesh të paligjshme. Hetimet do të provojnë nëse lidhjet klienteliste, transfertat e parave, mund të implikojnë persona që shkojnë mbi zonjën Karçanaj. Në kushte normale do të ishte e papranueshme që qeverisja të vijonte punën pa dhënë llogari për të gjitha këto që po ndodhin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
