Konferenca Ipeshkvnore e Shqipërisë ka reaguar mbi protestat e zhvilluara në Tiranë kundër projektit të ndërtimit të një resorti turistik në zonën e Zvërnecit, duke bërë thirrje për dialog, respektim të mjedisit dhe dëgjim të shqetësimeve të qytetarëve.
Në një deklaratë për shtyp, ipeshkvijtë shprehin vlerësimin për çdo zhvillim që synon përmirësimin e jetës së njerëzve, por theksojnë se ai duhet të jetë në përputhje me mbrojtjen e ambientit, respektimin e pronës së ligjshme dhe dinjitetit të komuniteteve lokale.
Sipas deklaratës, përfshirja e komuniteteve vendore dhe dëgjimi i zërit të tyre është një element thelbësor për çdo projekt që prek jetën dhe të ardhmen e banorëve. Kisha nënvizon se zhvillimi ekonomik nuk mund të shihet vetëm përmes përfitimeve financiare, por duhet të ketë në qendër njeriun, familjen dhe të mirën e përbashkët.
Konferenca Ipeshkvnore vëren se protestat e fundit pasqyrojnë pakënaqësi më të gjerë qytetare ndaj sistemit politik dhe mënyrës së vendimmarrjes, duke kërkuar që institucionet të dëgjojnë me vëmendje zërin e qytetarëve dhe të rinjve, të cilët shpesh ndihen të përjashtuar nga proceset që ndikojnë në të ardhmen e tyre.
Në deklaratë bëhet thirrje për shmangien e gjuhës së urrejtjes dhe për ndërtimin e një dialogu të sinqertë ndërmjet qytetarëve, institucioneve dhe forcave politike, me synimin për të gjetur zgjidhje brenda kornizave demokratike dhe në frymën e integrimit europian.
“Zëri i të gjithëve duhet të dëgjohet dhe të vlerësohet me kujdes e respekt nga ana e politikës, e qeverisë dhe e opozitës”, thuhet në deklaratën e Konferencës Ipeshkvnore të Shqipërisë.
Deklarata mbyllet me një apel për unitet dhe përgjegjësi shoqërore, duke theksuar se dialogu mbetet rruga më e mirë për zgjidhjen e mosmarrëveshjeve dhe ndërtimin e një zhvillimi të qëndrueshëm për vendin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
