Liderët e vendeve të rajonit janë mbledhur në kryeqytetin gjerman për Samitin e Berlinit. Në orët e pasdites, kryeministri Rama është takuar me kancelaren gjermane, Angela Merkel. Sipas zyrës së shtypit të Kryeministrisë, gjatë takimit është diskutuar mbi ecurinë e reformës në drejtësi dhe procesin e integrimit të Shqipërisë në Bashkimin Europian.
Po ashtu, Rama ka folur edhe për pritshmëritë e qeverisë shqiptare për raportin e Komisionit Europian që pritet të publikohet në fund të muajit maj.
Megjithatë, çështja e hapjes së negociatave duket se është diçka që do të presë edhe për disa kohë. Sipas DW, e cila u referohet burimeve diplomatike, Franca nuk dëshiron ta zërë fare në gojë çështjen e zgjerimit të BE-se në prag të zgjedhjeve për Parlamentin Evropian, që do të mbahen në fund të majit.
Po sot, kancelarja gjermane është takuar edhe me kryeministrin e Maqedonisë së Veriut, një tjetër vend i rajonit që gjithashtu aspiron anëtarësimin në BE.
Edhe pse shihet si mbështetëse e çeljes së negociatave, Merkel nuk mund të marrë asnjë vendim pa miratimin e Bundestagut. Sërish sipas DW, e cila citon qarqet politike pranë CDU-së, afati kohor që nga publikimi i raportit të progresit të BE-së, më 29 maj deri në samitin e BE-së në qershor nuk mjafton për të marrë një vendim për çeljen e negociatave. Burime nga CDU/CSU thonë se vendimi i tyre do të shtyhet në shtator.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
